Dende o 11 de decembro de 2019, o INSS pon a disposición das empresas un servizo co que poderán descargarse información sobre as variacións que experimenten as prestacións de Seguridade Social recoñecidas aos seus traballadores, tanto subsidios coma outras que afecten os contratos de traballo ou as obrigas empresariais coa Seguridade Social.

A partir desta data, o Ficheiro INSSEMPRESAS (FIE) estará diariamente a disposición dos usuarios principais das autorizacións RED de cada empresa a través de SILTRA, ou, no seu defecto, a través de EDITRAN.

Este servizo configúrase como unha canle de comunicación segura, áxil e de doada incorporación nas aplicacións de xestión nóminas das empresas, polo que, axudará non só ao cumprimento das obrigas coa Seguridade Social senón, tamén, á xestión do seu persoal.

Así mesmo, dende o 20 de setembro de 2021 está dispoñible o novo servizo FIER, desenvolvido polo INSS, que permite a calquera usuario dunha autorización RED, a través do Sistema RED Online e en formato Excel, a descarga e posterior consulta da información contida no FIE. Este novo servizo FIER vai destinado, principalmente, aos usuarios de autorizacións RED Directo, é dicir, empresas con menos de vinte e cinco traballadores que non teñen a posibilidade de recibir o FIE a través de SILTRA, e que agrupan entre todas elas a un total de cento sesenta mil traballadores. Desta forma, dáse cobertura a un colectivo que, ata a data, non estaba incluído na información recibida a través do Ficheiro INSS Empresas. Cabe destacar, entre as peculiaridades do novo aplicativo FIER, a posibilidade de descargar conxuntamente un período de tempo máximo de 17 días, sempre e cando non se superen 300 rexistros por cada consulta.

Polo tanto, a través destes dous servizos, FIE e FIER, habilítase de xeito definitivo unha ferramenta de acceso a todos os usuarios RED, que lles permita descargar os ficheiros postos á súa disposición e coñecer diariamente información sobre as prestacións de incapacidade temporal, incapacidade permanente, xubilación, nacemento e coidado do menor e demais prestacións que constan nas bases de datos deste Instituto e que teñan recoñecidas os traballadores vinculados ao código de conta de cotización consultado.

Premendo na seguinte ligazón Manuais de usuario pódese consultar o Manual de usuario do FIER, onde se explica en detalle a forma de acceso ao servizo, así como os campos contidos na pantalla de inicio da aplicación e as accións que se poden realizar. Así mesmo, a estrutura da mensaxe FIE 2.0, o seu contido e a descrición dos seus campos, así como os posibles valores destes encóntranse recollidos no deseño de rexistro que se pode consultar na seguinte ligazónInstrucións Técnicas.