Como norma xeral, os traballadores desprazados están sometidos á lexislación de seguridade social do país en cuxo territorio estean exercendo a súa actividade laboral. Así e todo, se se trata dun traslado temporal poden manter a lexislación española de Seguridade Social baseándose nos termos e cumprindo os requisitos que se indican a continuación:

Só se aplica aos traballadores españois ou tunisianos.

Desprazamento inicial

Os traballadores por conta allea que exercen a súa actividade nunha empresa española que os traslada a Tunisia para exercer alí temporalmente a súa actividade han solicitar ante a Dirección Provincial da Tesourería Xeral da Seguridade Social ou administracións dela a expedición do correspondente certificado de desprazamento.

Os traballadores por conta propia non poden acollerse ao disposto neste apartado para manter a lexislación española de Seguridade Social nos seus desprazamentos a Tunisia. Así e todo, poden realizar a súa solicitude de acordo co establecido no apartado "Outras excepcións".

Formulario que se debe tramitar

A empresa efectuará a súa solicitude mediante o modelo TA.200  "Solicitude de mantemento da lexislación española de Seguridade Social.- Desprazamentos iniciais" e acompañará o formulario ES/TUN.101 "Certificado de lexislación aplicable", cuberto en triplicado exemplar.

O formulario expedido pola dirección provincial ou administración correspondente certifica que o traballador continúa sometido á lexislación española de Seguridade Social durante o seu desprazamento nese país e, en consecuencia, está exento de cotizar á seguridade social tunisiana.

Período de autorización

O prazo máximo da duración do desprazamento é de vinte e catro meses.

Prórroga ordinaria

Se os traballadores por conta allea deben prolongar a súa estadía nese país máis alá dos dous anos inicialmente previstos, o empresario deberá solicitar, cunha antelación suficiente á finalización do período autorizado, a prórroga do mantemento da lexislación española de Seguridade Social ante a Subdirección Xeral de Afiliación e Procedementos Especiais da Tesourería Xeral da Seguridade Social.

Formulario que se debe tramitar

A solicitude de prórroga deberá efectuarse no modelo TA.202  "Solicitude de mantemento da lexislación española de Seguridade Social en aplicación do art.17 do Regulamento CEE  1408/71 e doutras prórrogas dos Convenios Bilaterais" e se achegarán catro exemplares do fomulario ES/TUN.102 "Certificación de prórroga do desprazamento", que se remitirán á Institución Competente de Tunisia para que unha vez cuberta a parte B dos mesmos os devolva a este Organismo.

Expresada a conformidade no formulario, este acredita que o traballador continúa sometido á Seguridade Social española durante o período autorizado.

Período de autorización

O prazo máximo da prórroga é de dous anos.

Outros desprazamentos

Direccións provinciais ou administracións da Tesourería Xeral da Seguridade Social

Serán os órganos competentes para autorizar os desprazamentos de:

• Persoal itinerante das empresas de transporte aéreo con sede en España que exerce a actividade nos dous países.
• Traballadores asalariados que exercen a súa actividade a bordo dun buque con bandeira tunisiana pero son remunerados por unha empresa ou persoa con domicilio en España.
• Traballadores españois que residen en España e que prestan os seus servizos nunha empresa pesqueira mixta constituída en Tunisia e nun buque abandeirado no mesmo país.
• Persoas enviadas en misións de cooperación.

A autorización expedirase no formulario E/TUN.1, "Certificado de lexislación aplicable". A empresa, xunto a este formulario cuberto por triplicado, achegará a solicitude TA-200.

Subdirección Xeral de Afiliación e Procedementos Especiais.

Para os desprazamentos de:

• Funcionarios españois destinados en Tunisia,

A Subdirección Xeral de Afiliación e Procedementos Especiais expedirá, a petición do organismo público, o certificado E/TUN.101 "Certificado de lexislación aplicable", para toda a duración do desprazamento. A solicitude debe efectuarse mediante o modelo (TA-202).

Para os desprazamentos de:

• Españois que desempeñan a súa actividade nas misións diplomáticas ou oficinas consulares de España en Tunisia.
• Persoal ao servizo privado dos anteriores, con nacionalidade española, que optan pola lexislación española de Seguridade Social,

A Subdirección Xeral de Afiliación e Procedementos Especiais da Tesourería Xeral, a petición do Organismo público ou do traballador, expedirá o certificado E/TUN.103 "Exercicio do Dereito de opción", que deberá presentarse en triplicado e asinado polo traballador, para toda a duración do desprazamento.

Outras excepcións

A tramitación das solicitudes doutras excepcións será xestionada pola Subdirección Xeral de Afiliación e Procedementos Especiais da Tesourería Xeral da Seguridade Social.

A empresa ou traballador por conta propia efectuarán a súa solicitude mediante o modelo TA.202 "Solicitude de mantemento da lexislación española da Seguridade Social en aplicación do art. 17 do regulamento CEE 1408/71 e doutras prórrogas dos convenios bilaterais".

Dada a conformidade por parte da Seguridade Social de Tunisia e a Subdirección Xeral de Afiliación e Procedementos Especiais da Tesourería Xeral da Seguridade Social expedirá o formulario ES/TUN.101 "Certificado de lexislación aplicable", que acredita que o traballador continúa sometido á Seguridade Social española durante o período que foi autorizado.