Duración

Desde o  31/07/2025 a duración da prestación para ambos os proxenitores, adoptantes, gardadores ou acolledores será de dezanove semanas, que no suposto de monoparentalidade (por existir unha única persoa proxenitora, adoptante, gardadora ou acolledora) será de trinta e dúas semanas. 

Ditas semanas distribuiranse para cada unha das persoas proxenitoras, adoptantes, gardadoras ou acolledoras do seguinte xeito:

1. Seis semanas ininterrompidas inmediatamente posteriores ao parto, á resolución xudicial pola que se constitúe a adopción ou ben á decisión administrativa de garda con fins de adopción ou de acollemento. Estas semanas serán obrigatorias e haberán de gozarse a xornada completa.
2. Once semanas, vinte e dúas no caso de monoparentalidade, que poderán distribuírse a vontade da persoa traballadora, en períodos semanais a gozar de forma acumulada ou interrompida e exercitarse:
   • Nos supostos de nacemento, desde a finalización da suspensión obrigatoria posterior ao parto ata que o fillo ou a filla cumpra doce meses. Non obstante, a nai biolóxica (incluídas as persoas trans xestantes) poderá anticipar o seu exercicio ata catro semanas antes da data previsible do parto.
   • Nos supostos de adopción, garda con fins de adopción ou acollemento, dentro dos doce meses seguintes á resolución xudicial pola que se constitúa a adopción ou ben á decisión administrativa de garda con fins de adopción ou de acollemento.
     

3. Dúas semanas, catro no caso de monoparentalidade, para o coidado do menor que poderán distribuírse a vontade da persoa traballadora, en períodos semanais de forma acumulada ou interrompida ata que o fillo, a filla ou o menor cumpra os oito anos.

   O dereito ao goce destas semanas será de aplicación aos nacementos, adopcións, gardas con fins de adopción ou acollementos producidos a partir do 2 de agosto de 2024, e poderá solicitarse a partir do 1 de xaneiro de 2026.

Regras comúns a nacementos, adopcións, gardas con fins de adopción e acollementos:

1. Respecto do goce das trece últimas semanas, vinte e seis en supostos de monoparentalidade (non obrigatorias):
   • Poderán gozarse en réxime de xornada completa ou de xornada parcial, previo acordo entre a empresa e a persoa traballadora.
   • A persoa traballadora deberá comunicar á empresa, cunha antelación mínima de quince días, o exercicio deste dereito.
   • Cando os dous proxenitores, adoptantes, gardadores ou acolledores que exerzan este dereito traballen para a mesma empresa, a dirección empresarial poderá limitar o seu exercicio simultáneo por razóns fundadas e obxectivas, debidamente motivadas por escrito.
     

2. Nos casos de falecemento do fillo, filla ou menor, o período de suspensión non se verá reducido, agás que se reincorporen ao traballo transcorridas as seis semanas de descanso obrigatorio.

3. No caso de falecemento dunha das persoas proxenitoras, adoptantes, gardadoras con fins de adopción ou acolledoras, a outra persoa poderá facer uso da totalidade ou, se é o caso, da parte que reste de permiso.

4. Ampliacións da duración da prestación:

   • 1 semana para cada persoa proxenitora, adoptante, gardadora ou acolledora, por cada fillo, filla ou menor, a partir do segundo, en caso de nacemento, adopción, garda con fins de adopción ou acollemento múltiple.

   • 1 semana para cada persoa proxenitora, adoptante, gardadora ou acolledora, en caso de discapacidade do fillo, filla ou menor.
     

No caso de haber unha única persoa proxenitora, adoptante, gardadora ou acolledora esta poderá gozar das ampliacións completas.

Regras específicas:

• Nos casos de parto prematuro con falta de peso e aqueles supostos nos que o neonato deba permanecer hospitalizado a continuación do parto, por un período superior a sete días, o período de suspensión e a prestación poderase ampliar en tantos días como o nacido se encontre hospitalizado, cun máximo de trece semanas adicionais. Nestes casos, o período de suspensión poderá computarse, por instancia da nai biolóxica ou do outro proxenitor, a partir da alta hospitalaria. Exclúense do devandito cómputo as semanas de descanso obrigatorio.
• Nos supostos de adopción internacional, cando sexa necesario o desprazamento previo dos proxenitores ao país do adoptado, o período de suspensión poderá iniciarse ata 4 semanas antes da resolución pola que se constitúe a adopción.
• Nos supostos de adopción, garda con fins de adopción ou acollemento, en ningún caso un mesmo menor dará dereito a varios períodos de suspensión na mesma persoa traballadora.

De conformidade con as letras a), b) e c) do artigo 49 do EBEP, a duración dos permisos por nacemento, adopción, garda con fins de adopción ou acollemento será de dezanove semanas, que no suposto de monoparentalidade (por existir unha única persoa proxenitora, adoptante, gardadora ou acolledora) será de trinta e dúas semanas.

Distribuiranse da seguinte maneira para cada unha das persoas proxenitoras, adoptantes, gardadoras ou acolledoras:

1. Seis semanas ininterrompidas inmediatamente posteriores ao parto, a resolución xudicial pola que se constitúe a adopción ou ben da decisión administrativa de garda con fins de adopción ou de acollemento tanto temporal como permanente. Estas semanas serán obrigatorias e haberán de gozarse a xornada completa.
2. Once semanas, vinte e dúas no caso de monoparentalidade, que poderán distribuírse a vontade da persoa proxenitora, adoptante, gardadora ou acolledora, en períodos semanais a gozar de forma acumulada ou interrompida e exercitarse:
   • Nos supostos de nacemento, desde a finalización do descanso obrigatorio posterior ao parto ata que o fillo ou a filla cumpra doce meses.
   • Nos supostos de adopción, garda con fins de adopción ou acollemento, dentro dos doce meses seguintes á resolución xudicial pola que se constitúa a adopción ou ben á decisión administrativa de garda con fins de adopción ou de acollemento.
     
3. Dúas semanas, catro no caso de monoparentalidade, para o coidado do menor que poderán distribuírse a vontade da persoa traballadora, en períodos semanais de forma acumulada ou interrompida ata que o fillo, a filla ou o menor cumpra os oito anos. O dereito ao goce destas semanas será de aplicación aos nacementos, adopcións, gardas con fins de adopción ou acollementos producidos a partir do 2 de agosto de 2024, e poderá solicitarse a partir do 1 de xaneiro de 2026.

Para os efectos do disposto nos apartados anteriores, o termo de nai biolóxica inclúe tamén ás persoas trans xestantes.

Regras comúns a nacementos, adopcións, gardas con fins de adopción e de acollemento:

1. Respecto do goce das trece últimas semanas, vinte e seis en supostos de monoparentalidade (non obrigatorias):
   • Poderán gozarse a xornada completa ou a tempo parcial.
   • No caso de gozo interrompido requirirase, para cada período de gozo, un aviso previo de polo menos quince días e realizarase por semanas completas.
     
2. Nos casos de falecemento do fillo, da filla ou do menor, o período de duración do permiso non se verá reducido, agás que se solicite a reincorporación ao traballo transcorridas as seis semanas de descanso obrigatorio.
3. Ampliacións da duración da prestación:
   • 1 semana para cada persoa proxenitora, adoptante, gardadora ou acolledora, por cada fillo, filla ou menor, a partir do segundo, en caso de nacemento, adopción, garda con fins de adopción ou acollemento múltiple.
   • 1 semana para cada persoa proxenitora, adoptante, gardadora ou acolledora, en caso de discapacidade do fillo, filla ou menor.
     

Regras específicas:

• Nacemento:
  • Nos casos de parto prematuro e naqueles supostos nos que o neonato deba permanecer hospitalizado a continuación do parto, a prestación poderase ampliar en tantos días como o nacido se encontre hospitalizado, cun máximo de trece semanas adicionais.
  • No caso de falecemento da nai biolóxica ou do outro proxenitor distinto á nai biolóxica, o outro proxenitor poderá facer uso da totalidade ou, no seu caso, da parte que lle reste de permiso.

• Nos supostos de adopción internacional, terase dereito ademais a un permiso de ata dous meses de duración percibindo durante ese período exclusivamente as retribucións básicas. Á súa vez, pódese iniciar o permiso de adopción, garda ou acollemento, ata catro semanas antes da resolución xudicial pola que se constitúa a adopción ou a decisión administrativa de acollemento.
• Nos supostos de adopción, garda con fins de adopción ou acollemento, en ningún caso un mesmo menor dará dereito a varios períodos de goce do permiso na mesma persoa traballadora.