O estudante vítima de un accidente acontecido no ámbito académico terá dereito ás seguintes prestacións: 

A asistencia médica e farmacéutica debe solicitarse no prazo de un ano dende que teña lugar o accidente.

• Duración:
  • A cobertura prodúcese dende o momento do accidente ata a data na que se produce a alta médica ou a declaración de incapacidade, e en todo caso, co prazo máximo de duración de un ano dende o accidente.
• Elección de facultativo e centro sanitario:
  • Se na provincia á que se traslada o estudante non existe un médico ou centro colaborador co Seguro Escolar, polo que só pode acudir a un médico ou centro non colaborador, aboaráselle ao estudante a totalidade dos gastos orixinados polo accidente.
  • Nos casos de asistencia urxente debidamente xustificada nos que o estudante acudise a centros privados non concertados, ben porque o estudante non se atope en condicións de proceder á elección do centro hospitalario, ou ben pola distancia ata o centro concertado, aboaráselle ao estudante a totalidade dos gastos ocasionados.
  • Os gastos de desprazamento só se aboarán en caso de urxencia vital. 
• As prestacións farmacéuticas por accidente aboaranse na súa totalidade polo Seguro Escolar, sempre que este recoñeza a súa relación co accidente.
• A asistencia médica inclúe, no seu caso:
  • O internamento sanatorial e a intervención cirúrxica.
  • O fornecemento e renovación dos aparatos de próteses e ortopédicos que se consideren necesarios para a asistencia.
  • O tratamento de rehabilitación necesario para a curación.
  • As probas médicas necesarias para o seu diagnóstico ou tratamento.

• Se o accidente produce e se declara unha incapacidade permanente e absoluta para os estudos xa iniciados, aboarase unha indemnización que oscila entre 150,25 euros  e 601,01 euros, fixada proporcionalmente ao tempo de estudos xa realizados e á diminución da capacidade ulterior para unha actividade profesional.

• Se o accidente produce e se declara unha grande invalidez para os estudos, quedando incapacitado o estudante para os actos máis esenciais da vida, abóase unha pensión vitalicia de 144,24 euros anuais.

• Se o accidente, neste caso escolar ou non, producise a morte, aboaráselles aos familiares 30,05 euros en concepto de gastos de enterro.

• Se o accidente se producise en lugar distinto ao da residencia familiar, estes gastos poden oscilar entre 30,05 e 120,20 euros.

• Se o estudante falecido tivese a cargo cónxuxe, parella de feito formalizada e acreditada polo 221 LGSS, fillos, ascendentes directos maiores de 65 anos ou incapacitados para todo traballo, ou irmáns menores de idade ou incapacitados para todo traballo, concederanse 300,51 euros.