Hitzarmenean dauden prestazioak

Informazio orokorra:

Hitzarmena prestazio hauei aplikatuko zaie:

Espainiari dagokionez:

Gizarte Segurantzako Espainiako sistemaren prestazio hauei:

• Amatasunagatiko prestazio ekonomikoak.
• Ezintasun iraunkor, zahartzaro, heriotza eta biziraupenagatiko prestazioak.
• Familia-babeseko prestazioak.
• Lan-istripuagatiko eta lanbide-gaixotasunagatiko prestazio ekonomikoak.

Uruguairi dagokionez:

Gizarte Segurantzaren prestazio hauek jasotzeko:

• Amatasunagatiko prestazioen arloko araubidea.
• Banatze-sisteman edo banakako kapitalizazioan oinarritutako erretiro- eta pentsio-araubideak.
• Lan-istripuen eta lanbide-gaixotasunen araubidea.

Prestazio horiei dagokienez, kontuan izan behar da:

• Hitzarmenak aurreikusten dituen kotizaziopeko prestazioak eskuratzeko, Espainian eta Uruguain betetako aseguru-aldiak gehitu daitezke.
• Kontribuzio-izaerako prestazio ekonomikoak, lan-istripuaren eta lanbide-gaixotasunaren ondoriozko aldi baterako ezintasuna izan ezik, Espainian edo Uruguain bizi den edo ez kontuan hartu gabe jaso ahal izango dira.
• Herrialde bakoitzak zuzenean ordainduko dizkio bere prestazioak onuradunari.
• Bi herrialdeetako legediek kotizaziopeko pentsioa jasotzeko eskatzen dituzten baldintzak betetzen dituzten pertsonek pentsio hori herrialde bakoitzetik jaso ahal izango dute.

Amatasuna

Onuraduna aseguratuta dagoen herrialdeak aitortzen du, beharrezkoa bada beste herrialdeko aseguru-aldiak kontuan hartuta.

Baliaezintasuna, zahartzaroa eta biziraupena

1.- Espainiako Gizarte Segurantzako pentsioak eta Uruguaiko banaketa-sistemako erretiro eta pentsioak.

Herrialde bakoitzak bere aldetik aztertuko du prestazio-eskaera, honela:

• Interesdunak prestazioa jasotzeko eskubidea lortzen duen egiaztatuko da, bere aseguru-aldiak bakarrik kontuan hartuta, beste herrialdekoak batu gabe.

• Era berean, norberaren aseguru-aldiei beste herrialdean egiaztatutakoak gehituz kalkulatuko da prestazioa. Kasu horretan, prestazioaren zenbatekoa ez da osoa izango, prestazioa ematen duen herrialdean betetako aseguru-aldien eta Espainiako eta Uruguaiko aldien baturaren arteko proportzioaren araberakoa baizik.

• Aurreko paragrafoetan adierazitakoaren arabera kalkulatutako prestazioak konparatuko dira, eta herrialde bakoitzak interesdunarentzat mesedegarriena den prestazioa aitortu eta ordainduko du.
  
• Espainiako Gizarte Segurantzaren erretiroagatiko pentsiorako Uruguain egiaztatutako aseguru aldien guztizkoa zenbatu bada, guztizko zenbaketa hori erabiliko da pentsioa zein adinetan jaso ahal izango den kalkulatzeko.

2.- Uruguaiko banakako kapitalizazio-sistemako erretiroak eta pentsioak:

• Aurreikuspeneko aurrezki-funtsen administratzaile batean afiliatutako langileek prestazioak jasotzeko eskubidea izango dute, banakako kapitalizazio-kontuetan pilatutako zenbatekoaren kargura.

• Prestazio horiek Uruguaiko banaketa-araubidearen kargurako prestazioei gehituko zaizkie, baldin eta Uruguaiko legerian eskatutako baldintzak betetzen badituzte.

Lan-istripua eta lanbide-gaixotasuna:

Istripua gertatu edo gaixotu den egunean langilea zein herrialderen legediari lotuta dagoen, herrialde horrek zehaztuko du prestazioa.