Prestacións incluídas no Convenio

Información xeral

O Convenio aplícase ás seguintes prestacións:

En relación con España:

Ás seguintes prestacións do sistema da Seguridade Social:

• Prestacións por incapacidade permanente que non teña a súa causa en accidente de traballo ou enfermidade profesional.
• Prestacións por vellez.
• Prestacións por morte e supervivencia que non teñan a súa causa en accidente de traballo ou enfermidade profesional.
• Prestacións familiares.

En relación co Canadá:

Aplícase ás prestacións incluídas nas lexislacións do Seguro de Vellez e do réxime de Pensións do Canadá.

Respecto a estas prestacións hai que ter en conta que:

• Para adquirir as prestacións previstas no Convenio pódense sumar os períodos de seguro españois e os períodos de residencia cumpridos no Canadá.

• As prestacións económicas, con excepción das non contributivas españolas, poderanse percibir con independencia de que o interesado resida ou se encontre en España ou no Canadá.

• Cada país aboará as súas propias prestacións directamente ao beneficiario.

• As persoas que reúnan os requisitos esixidos polas lexislacións de ambos os dous países para ter dereito a pensión contributiva, poderán percibila de cada un deles.

Prestacións da Seguridade Social española

A Institución competente española examinará a solicitude de prestación tendo en conta unicamente os períodos de seguro cumpridos en España, e se alcanza dereito á pensión sen necesidade de sumar os períodos de seguro ou de residencia do Canadá, concederáselle esta.

Se o interesado non alcanza dereito segundo o indicado no parágrafo anterior, esta Institución sumará os períodos de seguro ou residencia acreditados no Canadá. Neste suposto, o importe da pensión non será íntegro senón segundo a proporción existente entre os períodos de seguro cumpridos en España e a suma dos períodos de ambos os dous países.

No suposto de pensión de xubilación da Seguridade Social española para a que se totalizasen períodos de seguro acreditados no Canadá, a devandita totalización utilizarase igualmente para determinar a idade na que se pode acceder á pensión.

Prestacións da Seguridade Social canadense

A Institución competente canadense examinará a solicitude de prestación tendo en conta unicamente os períodos de residencia ou de cotización do Canadá, e se alcanza dereito á pensión sen necesidade de sumar os períodos españois, concederáselle esta.

• Lei de Seguro de Vellez

Se, segundo o parágrafo anterior, a persoa non alcanza dereito a percibir a pensión polos períodos de residencia canadenses, totalizaranse os períodos de residencia españois. De igual modo, se o interesado non alcanza dereito a percibir a pensión fóra do Canadá, segundo os períodos de residencia canadenses, totalizaranse os períodos de residencia españois.

Nestes supostos, a contía da pensión aboable calcularase sobre os períodos de residencia canadenses.

• Réxime de Pensións do Canadá

Se o interesado non alcanza dereito á pensión polos períodos cotizados neste réxime, a Institución competente canadense sumará os períodos cotizados en España. A contía da devandita prestación calcularase multiplicando a contía determinada segundo a lexislación canadense pola fracción resultante da relación entre os períodos de cotización efectivos ao Réxime de Pensións do Canadá e o período mínimo requirido para ter dereito a esa prestación.