Elikagaiak Bermatzeko Funtsaren aurrerakinak

Eskaera:

Aurrerakina aitortzeko, aurrerakinaren onuradun den adingabearen zaintza eta jagoletza duen familia-unitateko kideak eskaera egin beharko du.

Adinekoa desgaitua bada, baina ez judizialki ezgaitua, berak egin ahal izango du eskaera.

Zenbatekoa:

100 euro hilean onuradun bakoitzeko, salbu eta ebazpen judizialak hileko zenbateko txikiagoa ezartzen badu; kasu horretan, ebazpen judizialak ezarritako zenbatekoa ordainduko da.

Jasotzeko gehieneko epea:

18 hilabete, modu jarraituan edo etenean.

Ondorio ekonomikoak:

Eskaera egin eta hurrengo hilaren lehen eguna.

Aurrerakinaren hartzailea:

Aurrerakina adingabearen zaintza eta jagoletza duenak jasotzen du (normalean aitak edo amak), salbu eta desgaitasuna izan baina judizialki ezgaituta ez badago; kasu horretan, adingabeak berak jasoko du aurrerakina.

Bateraezintasunak:

Aurrerakina jasotzea bateraezina da administrazio publikoek onartutako izaera eta helburu bereko beste prestazio edo laguntza batzuekin. Adingabe onuradunaren zaintza eta jagoletzaren titularrak horietako bat aukeratu beharko du.

Aurrerakina jasotzen duenaren betebeharrak:

• Aurrerakinerako eskubideari eusteko edo aurrerakinaren zenbatekoa finkatzeko eragina izan dezaketen gorabehera guztiak jakinaraztea, 30 eguneko epean.
  
• Era berean, aurrerakina aitortzeko baldintzak egiaztatzeko zehazten diren egiaztapen-jarduketak bete beharko ditu.
  

Aurrerakina iraungitzea:

• onuradunaren adin-nagusitasuna betetzea;
  
• 18 hilerokoak jasotzea;
  
• mantenua ordaintzera behartuta dagoenak bere borondatez edo nahitaez ordaintzea;
  
• onuradunaren edo ordaintzeko betebeharra duenaren heriotza;
  
• baliabide ekonomikoen muga gainditzea familia-unitatearen diru-sarrerak aldatzeagatik;
  
• hala ezartzen duen ebazpen judiziala.
  

Aurrerakina itzultzea:

Bidegabe jasotako aurrerakinak jaso dituenak itzuli egin beharko ditu, uztailaren 29ko 939/2005 Errege Dekretuak onartutako Diru-bilketako Erregelamendu Orokorrean ezarritako prozeduraren arabera. Gizarte Segurantzaren Antolamenduko Zuzendaritza Nagusiak behar ez bezala jasotako zenbatekoa likidatuko du, zenbatekoa jakinaraziko du eta, jakinarazpenarekin batera, borondatezko bilketa-aldia hasiko du.

Estatua eskubide osoz subrogatuko da, interesdunari ordaindutako aurrerakinen zenbateko osoraino, elikagaiak ordaindu behar dituenaren aurrean Estatuak dituen eskubideetan.

Subrogazio horrek betebeharraren izaera eraldatzen du, eta izaera publikokoa izatera igarotzen da, eta Estatuak Aurrekontuen Lege Orokorrean aurreikusitako moduan kobratuko du. Horregatik, aurrerakina aitortzen duen ebazpena dagoela jakinaraziko zaio zergapekoari, eta, ondoren, Estatuari zor dizkion zenbatekoen likidazioa egin eta jakinaraziko zaio. Likidazio hori Altxor Publikoan sartu beharko du, eta, halakorik ezean, Zerga Administrazioko Estatu Agentziak eskatuko ditu betearazpen-aldian, premiamendu-prozedura administratiboaren bidez.

Aurrerakinak jasotzeko eskubidea izateko, adingabea dagoen familia-unitatearen baliabide ekonomikoek ezin izango dute gainditu Ondorio Askotariko Errenta Adierazle Publikoaren (OAEAP-IPREM) urteko zenbatekoa (aurrerakina eskatzeko unean indarrean dagoena) familia-unitatea osatzen duten seme-alaba adingabeen kopuruaren arabera dagokion koefizientearekin biderkatzearen ondoriozko diru-sarreren muga.

Koefiziente hori 1,5 izango da seme-alaba bakarra badago, eta 0,25 gehituko da seme-alaba bakoitzeko, honela:

• Seme-alaba 1: 1,5 x OAEAP-IPREM (aurrerakina eskatzeko unean indarrean): 10.800 € eskaeraren uneko urtean
  
• 2 seme-alaba: 1,75 x OAEAP-IPREM: 12.600 € eskaeraren uneko urtean
  
• 3 seme-alaba: 2 x OAEAP-IPREM: 14.400 € eskaeraren uneko urtean
  
• 4 seme-alaba: 2,25 x OAEAP-IPREM: 16.200 € eskaeraren uneko urtean
  horrela hurrenez hurren
  

2025ean, hau da OAEAP-IPREMen urteko balioa:

• 2025/01/01etik aurrera: 7.200,00 euro
  

Familia-unitatearen errenta eta diru-sarrera gisa zenbatuko dira, 2025eko urtarrilaren 1etik aurrera:

• Familia-unitateko kide guztien lan-etekinak; hau da, lanetik eratorritako diruzko edo gauzazko ordainsariak, gizarte-aurreikuspeneko araubideek aitortutako prestazioak – baliabide publiko edo pribatuen kargura finantzatzen direnak – eta Pertsona Fisikoen Errentaren gaineko Zergaren (PFEZ) Legeak lanekotzat jotzen dituen gainerako etekinak. Adibidez: bizitzeko gutxieneko diru-sarrera, gizarteratzeko errenta aktiboa, langabezia-prestazioa, etab.
  
• Kapitalaren etekinak, dirutan edo gauzatan, familia-unitateko kideren baten titulartasuneko ondasun edo eskubideetatik datozenak, baldin eta jarduera ekonomikoei atxikita ez badaude. Adibidez: banku-kontuen interesak, akzioen dibidenduak edo bonu-kupoiak, etab.
  
• Jarduera ekonomikoetatik eratorritako etekinak, PFEZaren Legean aurreikusitako moduan zenbatuta. Adibidez: Autonomoen errendimenduak.
  
• Familia-unitateko kideen ondarezko irabazi eta galeren saldo garbia. Adibidez: Aldaketak ondarearen balioan.
  

Familia-unitatearen urteko diru-sarrerak zenbatzeko, aurrerakina eskatzen den urte naturalean dituenak edo izango dituela aurreikusten direnak hartuko dira kontuan, betiere zenbateko osoa kontuan hartuta.

Baliabide ekonomikoen muga egiaztatutzat joko da eskatzaileak egiten duen familia-unitatearen errenta-aitorpenaren bidez, hargatik eragotzi gabe organo eskudunak egin ditzakeen egiaztapenak.

Aurrerakin horien ondorioetarako, familia-unitatetzat honako hauek soilik hartzen dira: aitak edo amak eta seme-alaba adingabeek osatzen dutena, judizialki aitortutako eta ordaindu gabeko mantenu-eskubide baten titularrak badira eta haien kargura badaude; eta adingabeek eta gurasoak ez diren beste pertsona fisiko batzuek osatzen dutena, baldin eta haien kargura badaude haien zaintza eta jagoletza izateagatik.

Desgaitasuna duten seme-alabak pertsona bakarreko familia-unitatetzat hartuko dira (norberaren diru-sarrerak zenbatuko dira). Gainera, familia-ingurunerako zaintza-prestazioak errenten zenbaketatik kanpo geratuko dira.