Convenio especial de coidadores non profesionais de persoas en situación de dependencia R.D. 615/2007

Este convenio pódeo subscribir a persoa que sexa designada como coidador na Resolución pola que se recoñece a prestación económica para coidados no ámbito familiar e apoio a coidadores non profesionais e como tal, teña a consideración de coidador non profesional no Programa Individual de atención (PIA), sempre que a persoa dependente, á que coida, perciba a prestación económica para coidados familiares regulamentada na Lei 39/2003, do 14 de decembro.

Poden asumir a condición de coidador non profesional as persoas que reúnan os requisitos establecidos en normativa reguladora das prestacións do Sistema para a Autonomía e Atención á Dependencia. En termos xerais:

• Cónxuxe
• Parente ata 3º grao.
• Persoa da contorna próxima da persoa dependente.
  

Non procederá a súa subscrición cando o interesado se encontre nalgunha das seguintes situacións:

• Realizando unha actividade profesional pola que deba quedar incluído no Sistema da Seguridade Social. Non obstante, exceptúanse os seguintes supostos:

  • Pódese subscribir o convenio cando o coidador xa estivese a realizar unha actividade laboral e reduza a súa xornada para a atención da persoa dependente, sempre que a base de cotización por estas actividades sexa inferior á base que corresponde ao convenio en atención ao grao de dependencia da persoa atendida.
  • Tamén poden subscribilo os coidadores non profesionais, con independencia de que sigan a realizar ou inicien unha actividade profesional, sempre que a base de cotización por estas actividades sexa inferior á base que corresponde ao convenio en atención ao grao de dependencia da persoa atendida.

Nestes casos, a base de cotización do convenio redúcese e será a diferenza entre a base que corresponde ao convenio en función do grao de dependencia e a base da actividade que se realiza.

• Alta en RETA, aínda que a súa base de cotización sexa inferior á que lle correspondería co convenio.
• Percibindo a prestación de desemprego. Non obstante, pódese compatibilizar coa prestación contributiva de desemprego a tempo parcial, sempre que a base de cotización pola prestación de desemprego sexa inferior á base que corresponde ao convenio.
• Pensionista de xubilación ou incapacidade permanente
• Pensionista de viuvez ou en favor de familiares e teña 65 ou máis anos de idade.
• Durante os períodos de excedencia laboral por coidados familiares, que teñan a consideración de períodos de cotización efectiva.
• Durante os períodos de redución de xornada, que teñan a consideración de períodos de cotización efectiva.
• Perceptor dunha pensión non contributiva.
• Perceptor dunha pensión estranxeira.
• Perceptor de axudas de réximes externos (MUFACE, ISFAS...).
• Profesional colexiado despois de optar pola mutualidade alternativa ao RETA.

Este tipo de convenio especial non esixe período de cotización previo á solicitude.

A cotización neste convenio especial ten por obxecto a cobertura das mesmas prestacións que o Convenio especial ordinario, ademais das seguintes:

• Incapacidade permanente derivada de accidente ou enfermidade profesional.
• Viuvez, orfandade e outras prestacións en favor de familiares, derivadas de accidente ou enfermidade profesional.
• Formación profesional.
  

A solicitude do Convenio Especial efectuarase, en calquera momento, unha vez sexa recoñecida a prestación económica para coidados familiares á persoa dependente pola Comunidade Autónoma correspondente, a través dos medios habilitados no apartado “Alta, baixa ou variación de datos do convenio especial” da sección “Trámites e Xestións de Convenios Especiais”.

A data de inicio deste convenio especial dependerá de cando se presente a solicitude de alta:

• Se a solicitude de alta se presenta dentro dos 90 días naturais seguintes á data de inicio de recoñecemento da prestación económica para coidados familiares á persoa dependente, os efectos do convenio especial serán a partir da devandita data de recoñecemento da prestación económica.
• Se a solicitude de alta se presenta fóra do prazo dos 90 días naturais seguintes á data de inicio de prestación de servizos, a data de inicio do convenio será desde o día da presentación da solicitude da alta.
  

Suxeito responsable do ingreso da cota:

O pagamento da cota do convenio especial será a cargo exclusivo da Administración do Estado (IMSERSO).

Non obstante, se o subscritor se encontra nalgunha das seguintes situacións e desexa manter a base de cotización pola que viña cotizando, pode optar por subscribir un convenio especial complementario a aquel que financia o IMSERSO, sendo ao seu cargo, a cota correspondente ao convenio complementario:

• Cando interrompese unha actividade laboral por conta allea ou por conta propia, co fin de dedicarse á atención da persoa dependente. Excepcionalmente, neste suposto, se a persoa dependente ten recoñecido o grao III, o 50 % da cota do convenio complementario será a cargo do subscritor e o 50 % restante será aboado polo IMSERSO (desde a entrada en vigor da DA 2.ª da Lei 3/2024, do 30 de outubro).
• Cando a subscrición deste tipo de convenio supuxese a extinción dun convenio anterior.
• Cando reducise a súa xornada e a correspondente retribución como consecuencia da realización dos coidados non profesionais.

Base de cotización

En caso de convenios especiais de coidadores non profesionais financiados polo IMSERSO, a base de cotización varía en atención ao grao de dependencia e horas de dedicación:

• Dependencia grao III: a base de cotización do convenio será a base mínima de cotización Réxime Xeral
• Dependencia grao II: a base de cotización do convenio será proporcional ao número de horas de dedicación recoñecidas, sen que poida ser inferior ao 50% da base mínima do Réxime Xeral.
• Dependencia grao I: a base de cotización do convenio será o 50% da base mínima do Réxime Xeral.

Non obstante, se o interesado desexa manter a base de cotización pola que viña cotizando, subscribindo un convenio especial complementario ao financiado polo IMSERSO, a base de cotización daquel será a diferenza entre a base do convenio de coidadores financiado polo IMSERSO e a base de cotización pola que viña cotizando con anterioridade á subscrición do convenio especial.

Determinación da cota:

Aplicarase sobre a base de cotización que corresponda en atención ao grao de dependencia e horas de dedicación o tipo único de cotización vixente no Réxime Xeral (o 28,30 %).

O resultado obtido multiplicarase polo coeficiente redutor que anualmente fixe a Orde de cotización: 0,77

Para os efectos do financiamento das accións formativas aos coidadores, cotizarase por formación profesional un 0,2% da base de cotización.

Así mesmo, desde o 1 de xaneiro de 2023, ingresarase ademais a cota correspondente ao Mecanismo de Equidade Interxeracional (MEI), tal como se establece para o Convenio especial ordinario.

Prazo de ingreso

O prazo de ingreso da cota é o mes natural seguinte ao que esta está referida.

Forma de pagamento

A forma de pagamento deste convenio especial é domiciliación bancaria.

Incremento da base de cotización con posterioridade á subscrición do CE

O incremento da base de cotización prodúcese na mesma porcentaxe que se incrementase a base mínima do Réxime Xeral da Seguridade Social.

Este convenio pódese compatibilizar coas seguintes situacións:

• Con actividade laboral, cando a base de cotización da actividade sexa inferior á do convenio especial en atención ao grao de dependencia da persoa atendida
• Coa prestación contributiva de desemprego a tempo parcial se a base da prestación é inferior á base do convenio.
• Co subsidio por desemprego para maiores de 52 anos.
• Coa renda activa de inserción
• Co subsidio de desemprego de traballadores fixos-descontinuos do Réxime Xeral.
• Co convenio especial voluntario de coidador non profesional.
• Con outro convenio de coidadores para o coidado de dous ou máis persoas dependentes, sempre que a suma das bases de cotización dos convenios non supere a base mínima de cotización do Réxime Xeral.
  

O convenio especial extinguirase por calquera das seguintes causas, concernentes á persoa subscritora do convenio especial:

• Realización dunha actividade cuxa base de cotización sexa igual ou superior á base de cotización do convenio especial.
• Recoñecemento da condición de pensionista por xubilación ou incapacidade permanente.
• Recoñecemento da condición de titular dunha pensión de viuvez ou en favor de familiar, cando teña 65 ou máis anos, en calquera dos réximes do sistema da Seguridade Social.
• Deixar de prestar os servizos como persoa coidadora non profesional ou por deixar de reunir os requisitos para ser considerada como tal.
• Por falecemento.

Ademais, este convenio especial extinguirase por:

• Fin da prestación económica para coidados familiares.
• Por falecemento da persoa asistida.

No suposto de que o coidador non profesional subscribise a cláusula adicional ao seu cargo, esta extinguirase, ademais das anteriores, polas seguintes causas:

• Por falta de aboamento das cotas correspondentes a 3 mensualidades consecutivas ou a 5 alternativas, salvo causa de forza maior.
• Por decisión do coidador. A solicitude de baixa do convenio especial pódese realizar a través das canles indicadas no apartado "Alta, baixa ou variación de datos do convenio especial" da sección "Trámites e Xestións de convenios especiais".
  

• Cando se formulen a través do servizo “Alta en convenio especial” dispoñible na Sede Electrónica da Seguridade Social, as solicitudes han de ir acompañadas da documentación que se describe no apartado “Documentación adxunta” do citado servizo.
• Cando se formulen a través da presentación do Modelo TA.0040 - Solicitude de alta/variación de datos/baixa do convenio especial de coidadores non profesionais. As solicitudes deben ir acompañadas da documentación que se describe nas instrucións do citado formulario.
  

• Artigo 28 da Orde TAS/2865/2003, do 18 de outubro pola que se regulamenta o convenio especial no Sistema da Seguridade Social
• No non establecido no citado artigo, resultará de aplicación o establecido no Capítulo I da Orde TAS/2865/2003, do 13 de outubro, relativo á regulación do Convenio especial ordinario.
• Real decreto 615/2007, do 11 de maio, polo que se regula a Seguridade Social dos coidadores das persoas en situación de dependencia.
• Real decreto-lei 6/2019, do 1 de marzo, de medidas urxentes para a garantía da igualdade de trato e de oportunidades entre mulleres e homes no emprego e a ocupación.
• Disposición adicional segunda e disposición transitoria única da Lei 3/2024, do 30 de outubro, para mellorar a calidade de vida das persoas con Esclerose Lateral Amiotrófica e outras enfermidades ou procesos de alta complexidade e curso irreversible.
  

O prazo para resolver a solicitude de subscrición deste convenio especial é o establecido con carácter xeral para as solicitudes de alta deste Convenio especial ordinario.