Convenio especial E.R.E. Empresa

Para a formalización deste convenio especial é necesaria a concorrencia dos seguintes requisitos:

• Presentación da solicitude de alta do convenio especial no prazo establecido.
• Por parte da empresa:
  • Non estar incursa en procedemento concursal, na data do despedimento.
• Por parte da persoa traballadora:
  • Figurar incluída no expediente de procedemento de despedimento colectivo.
  • Ter cumpridos 55 ou máis anos de idade, na data do despedimento.
  • Non ter a condición de mutualistas o 1 de xaneiro de 1967 nos termos do artigo 51.9 do texto refundido da Lei do Estatuto dos Traballadores, aprobado polo RDL 2/2015, do 23 de outubro.
  • Terlle sido notificado o despedimento pola empresa nos termos do artigo 51.4 do texto refundido da Lei do Estatuto dos Traballadores, aprobado polo RDL 2/2015, do 23 de outubro.

O convenio especial por Expediente de Regulación de Emprego (E.R.E.) diríxese ás empresas e ás persoas traballadoras que teñan cumpridos 55 ou máis anos de idade e fosen incluídas en procedementos de despedimento colectivo.

Ten por obxecto a cotización do período comprendido entre:

• O cesamento no traballo derivado do despedimento colectivo e
• A data na que a persoa traballadora cumpra a idade de 63 anos ou ben 61 anos no suposto de E.R.E. por causas económicas.

Non obstante, se a persoa traballadora fose beneficiaria da prestación contributiva por desemprego como consecuencia do despedimento colectivo, a cobertura do convenio especial empezaría a partir da data de extinción da citada prestación.

Prazo

A empresa deberá presentar a solicitude de alta do convenio especial durante a tramitación do procedemento de despedimento colectivo e, en todo caso, ata a data en que notifique individualmente o despedimento a cada persoa traballadora afectada.

No caso de que a empresa non proceda á solicitude de alta no convenio especial segundo o indicado no parágrafo anterior, a persoa traballadora poderá solicitar a alta dentro dos seis meses naturais seguintes á data en que a empresa lle notificase individualmente o despedimento.

Forma

A través da Sede Electrónica da Seguridade Social, a empresa poderá solicitar por Rexistro electrónico a alta neste tipo de convenio especial. O persoa traballadora, pola súa banda, poderá presentar a súa solicitude a través de IMPORTASS.

O prazo para resolver a solicitude de alta neste convenio especial é o establecido con carácter xeral para as solicitudes de alta do Convenio especial ordinario.

A cotización neste convenio especial ten por obxecto a cobertura das mesmas prestacións que o Convenio especial ordinario.

Suxeito responsable do ingreso da cota

As cotizacións correspondentes ao convenio especial serán a cargo exclusivo da empresa ata a data en que a persoa traballadora cumpra 63 anos ou ben, 61 anos no suposto de E.R.E. por causas económicas.

Determinación da cota a ingresar

Unha vez determinado o período de cobertura do convenio especial en función das circunstancias de cada persoa traballadora (idade, data de cumprimento da idade dos 61/63 anos, se ten dereito a prestacións de desemprego, etc.), desde a Tesouraría Xeral da Seguridade Social efectúase a totalización da cotización no momento da formalización do convenio especial.

As cotizacións polo referido período determinaranse aplicando á media das bases de cotización da persoa traballadora, nos últimos seis meses de ocupación cotizada, o tipo de cotización e coeficiente redutor aplicables. Adicionalmente, deberase cotizar polo Mecanismo de Equidade Interxeracional.

No suposto de que a persoa traballadora teña dereito ao subsidio para maiores de 52 anos, deducirase a cotización a cargo do Servizo Público de Emprego Estatal.

Revalorización voluntaria da base de cotización con posterioridade á alta do convenio especial. Cláusula adicional

A empresa e a persoa traballadora poderán pactar voluntariamente que a base de cotización do convenio especial se revalorice anualmente, a partir do ano seguinte ao da alta do convenio especial, podendo optar por algunha das seguintes modalidades de revalorización:

• Aplicación da porcentaxe en que se incrementase a base mínima do tramo 1 da táboa xeral de bases de cotización do Réxime Especial da Seguridade Social dos Traballadores por Conta Propia ou Autónomos (RETA). Non obstante, en tanto que a devandita base mínima non sexa superior á base de cotización mínima de RETA vixente a 31 de decembro de 2022 (960,60 €), non resultará de aplicación ningún incremento.
• Aplicación da porcentaxe en que se incrementase a base máxima de cotización.
• No suposto de que o traballador cotizase pola base máxima durante 24 meses, consecutivos ou non, nos últimos 5 anos, poderá optar porque a base de cotización do convenio especial se incremente ata a base máxima de cotización.

O custo da revalorización poderá ser asumido pola empresa ou pola persoa traballadora, de mutuo acordo.

Forma de pagamento

A cota totalizada correspondente a todos os convenios especiais E.R.E. que a empresa vai formalizar pode ser aboada mediante domiciliación bancaria, en pagamento único ou en pagamento fraccionado, sendo obrigatorio neste último suposto, a constitución de aval solidario suficiente ou ben, no seu caso, substituír a responsabilidade de pagamento da empresa pola dunha entidade financeira inscrita ou unha entidade aseguradora debidamente autorizada.

Prazo regulamentario de ingreso

No suposto de pagamento único, as cotas aboaranse dentro do mes seguinte ao mes en que se notificasen, ao suxeito responsable do pagamento, as resolucións de alta no convenio especial das persoas traballadoras.

No suposto de pagamento fraccionado, as primeiras anualidades aboaranse dentro do mes seguinte ao mes en que se notificasen, ao suxeito responsable do pagamento, as resolución de alta no convenio especial das persoas traballadoras. As segundas e sucesivas anualidades ingresaranse dentro do mes inmediatamente anterior á data de inicio da anualidade de que se trate.

A alta neste convenio especial é compatible con:

• A percepción do subsidio por desemprego para maiores de 52 anos.
• O exercicio de actividade. Neste caso, unha vez a persoa traballadora cumprise a idade de 63/61 anos, data na que se producirá a novación do convenio especial a cargo daquela, a Tesouraría Xeral da Seguridade Social determinará o importe en que a cotización ingresada pola empresa resultou coincidente coa efectuada pola realización de actividades por parte do traballador/a, aplicándose ao convenio especial novado.
  

O convenio especial extinguirase por calquera das seguintes causas, en relación coa persoa traballadora:

• Por adquirir o subscritor a condición de pensionista por xubilación ou por incapacidade permanente en calquera dos réximes do sistema da Seguridade Social.
• Por falecemento.
• Polo cumprimento de 63 anos ou ben, 61 anos no suposto de E.R.E. por causas económicas.
  

• Artigo 20 da Orde TAS/2865/2003, do 18 de outubro pola que se regulamenta o convenio especial no Sistema da Seguridade Social
• Disposición adicional décimo terceira do Real decreto lexislativo 8/2015, do 30 de outubro, polo que se aproba o texto refundido da Lei Xeral da Seguridade Social.

As solicitudes de alta han de ir acompañadas da seguinte documentación:

• Documento identificativo do traballador (Documento Nacional de Identidade -NIF- ou tarxeta de identidade de estranxeiro -NIE-).
• Documento identificativo do representante da empresa (Documento Nacional de Identidade -NIF- ou tarxeta de identidade de estranxeiro -NIE-).
• Acreditación do poder como representante legal da empresa.
• Resolución do ERE ou da comunicación da decisión empresarial de despedimento colectivo á Autoridade Laboral.
• Relación de todos os traballadores afectados polo E.R.E. (nome, apelidos e DNI ou NIE).
• Acta final do período de consultas no procedemento de despedimento colectivo.