Prestacións incluídas no Convenio

Información xeral

O Convenio aplícase ás seguintes prestacións:

En relación con España:

Ás seguintes prestacións do sistema da Seguridade Social:

Asistencia sanitaria por maternidade ou enfermidade ou accidente.
Prestacións económicas por incapacidade temporal e maternidade.
Prestacións por incapacidade permanente, vellez e morte e supervivencia.
Prestacións de protección familiar.
Prestacións por desemprego.
Prestacións económicas por accidente de traballo e enfermidade profesional.

En relación con Chile:

Á lexislación da Seguridade Social no referente a:

Asistencia sanitaria en casos de maternidade, enfermidade común e accidente non laboral comprendidas no sistema público de saúde.
Prestacións económicas por incapacidade laboral transitoria derivada de maternidade, enfermidade común ou accidente non laboral comprendidas no sistema público de saúde.
Prestacións de invalidez, vellez e supervivencia do Novo Sistema de Pensións baseado no réxime de capitalización individual e nos réximes administrados polo Instituto de Normalización Previsional.
Prestacións familiares.
Prestacións por desemprego.
Asistencia sanitaria e prestacións económicas derivadas de accidente de traballo e enfermidade profesional.

Respecto a estas prestacións hai que ter en conta que:

Para adquirir as pensións de carácter contributivo previstas no Convenio pódense sumar os períodos de seguro cumpridos en España e en Chile.
As pensións de carácter contributivo poderán percibirse con independencia de que se resida ou se atope en España ou en Chile.
Cada país aboará as súas propias prestacións directamente ao beneficiario.
As persoas que reúnan os requisitos esixidos pola lexislación de ambos os dous países para ter dereito a pensión contributiva, poderán percibir esta de cada un deles.

Asistencia sanitaria

A asistencia sanitaria recoñécea, de acordo coa súa lexislación, o país no que estea asegurado o traballador, totalizando cando sexa necesario os períodos de seguro de ambos os dous países, sempre que non se superpoñan, ou para o pensionista, o país que lle aboe a pensión.

Normalmente é prestada polo país que a recoñece pero tamén poden recibila cando se despracen ou residan no outro país nos casos seguintes:

Traballadores asegurados nun país, así como os seus familiares, que se despracen ao outro país temporalmente e que precisen de forma inmediata a asistencia sanitaria.
Traballadores asegurados nun país e enviados a traballar ao outro por un período non superior a tres anos, así como os familiares que o acompañen.
Familiares dun traballador asegurado nun país que residan no territorio do outro país.
Pensionistas dun país e os seus familiares que se atopen ou residan no outro país. Durante a estadía temporal teñen dereito a prestacións por necesidade inmediata.

As prestacións sanitarias sérvense no país onde se atope o beneficiario, e segundo o establecido na lexislación sanitaria e nos Servizos Públicos de Saúde dese país, durante o tempo que autorice a Institución do país onde o traballador estea afiliado ou que aboe a pensión.

Incapacidade temporal por enfermidade común ou accidente non laboral e Maternidade

Para o recoñecemento destas prestacións súmanse, se é necesario, os períodos de seguro de ambos os dous países.

Invalidez, Vellez e Supervivencia

Seguridade Social española e Réximes administrados polo Instituto de Normalización Previsional chileno

Cada país examinará por separado a solicitude de pensión na forma seguinte:
- Se o interesado alcanza dereito á pensión sen necesidade de sumar os períodos de seguro do outro país, concederalle a pensión que lle corresponda, tendo en conta unicamente os seus propios períodos de seguro.
- Se o interesado non alcanza dereito á pensión segundo o apartado anterior, sumaranse os períodos de seguro acreditados no outro país. O importe da pensión non será íntegro, senón en proporción aos períodos de seguro cumpridos no país que a outorgue e a suma total dos períodos de Chile e España
- No suposto de pensión de xubilación da Seguridade Social española para a que se totalizasen períodos de seguro acreditados en Chile, a devandita totalización utilizarase igualmente para determinar a idade na que se pode acceder á pensión.
Sistema Chileno de Capitalización Individual

Os afiliados a unha Administradora de Fondos de Pensións financiarán as súas pensións en Chile co saldo acumulado na súa conta de capitalización individual. Así e todo, se o saldo da súa conta individual é insuficiente para financiar pensións dunha contía polo menos igual á da pensión mínima garantida polo Estado, poderanse totalizar os períodos de seguro españois para poder acceder á dita pensión mínima.

Os afiliados ao Novo Sistema de Pensións poderán continuar pagando voluntariamente as súas cotizacións previsionais como traballadores independentes durante o tempo que residan en España e realicen unha actividade laboral pola que deban cotizar á Seguridade Social española. Estas cotizacións previsionais serán tidas en conta pola Institución chilena aínda que coincidan con períodos obrigatorios españois.

Accidente de Traballo e Enfermidade Profesional

A prestación será determinada polo país a cuxa lexislación estivese suxeito o traballador na data na que se produciu o accidente ou na que contraeu a enfermidade.