Pensións derivadas de actos de terrorismo

Teñen dereito a estas pensións extraordinarias todos os cidadáns, calquera que fose a súa nacionalidade, que sufran lesións permanentes invalidantes ou falezan como consecuencia de actos de terrorismo, sempre que non sexan responsables dos devanditos actos e que non teñan dereito a prestacións da mesma natureza en calquera réxime público de Seguridade Social.

Tramitación: os interesados deberán presentar ante a Dirección Xeral de Ordenación da Seguridade Social (Avda. do Xeneral Perón, 38, Edificio Master's II - 28020 Madrid) solicitude de pensión extraordinaria por actos de terrorismo, como vítima que non ten dereito a pensión en ningún réxime de Seguridade Social, acompañada da documentación que se esixe en cada caso.

A) Pensións de invalidez.
Contía: Quen resulte afectado de lesións permanentes invalidantes terá dereito a unha pensión de contía equivalente ao triplo do Indicador Público de Renda de Efectos Múltiples (IPREM) vixente en cada momento e que para o ano 2026 equivale, referida a catorce mensualidades, desde 1-1-2026 a 1.800 euros / (IPREM mensual: 600 euros/mes).

Efectos económicos: primeiro día do mes seguinte á data do acto terrorista, sempre que se formulase a solicitude de pensión dentro do período dun ano a contar desde o mesmo acto. Se a solicitude se formula transcorrido ese ano, os efectos económicos produciranse a partir do primeiro día do mes seguinte á solicitude.

B) Pensións familiares: viuvez, orfandade e en favor de pais.
Beneficiarios: En caso de falecemento como consecuencia das lesións producidas polo acto de terrorismo, causarase pensión en favor dos seguintes familiares:

• O cónxuxe do causante falecido sempre que non estea separado legalmente.
  
• Quen se atopase unido ao causante no momento do seu falecemento, formando unha parella de feito, sempre que se acrediten os seguintes requisitos:
  
  • O causante e o beneficiario:
    
    • Teñan unha análoga relación de afectividade á conxugal
      
    • Non exista vínculo matrimonial con outra persoa, nin se achasen impedidos para contraer matrimonio entre eles.
      
    • Se acredite, mediante o correspondente certificado de empadroamento, unha convivencia estable, notoria, ininterrompida e inmediata ao falecemento do causante non inferior a cinco anos.
  • Exista unha formalización pública da condición de parella de feito, que se acredite por:
    
    • Certificado de inscrición nalgún dos Rexistros específicos existentes nas CCAA ou Concellos do lugar de residencia, ou
    • Mediante documento público no que conste a constitución da devandita parella.
      
    • En ambos os casos a formalización deberá terse producido cunha antelación de dous anos con respecto á data do falecemento.
      

O dereito a pensión de viuvez extinguirase cando o beneficiario contraia matrimonio ou constitúa unha parella de feito.

• Os fillos do causante menores de 18 anos ou maiores incapacitados para todo traballo ao momento do falecemento do causante ou antes do cumprimento da citada idade. Se o orfo non realiza traballo lucrativo ou, cando realizándoo, os ingresos que obteña resulten inferiores ao salario mínimo interprofesional, poderá ser beneficiario da pensión de orfandade sempre que, á data do falecemento do causante, fose menor de 22 anos ou de 24 se non sobrevivise ningún dos dous pais, ou o orfo presentase unha discapacidade en grao igual ou superior ao 33 %. Neste caso, a pensión de orfandade extinguirase cando o titular cumpra os 24 anos de idade, salvo que estivese a cursar estudos, manténdose nestes supostos a percepción da pensión ata o primeiro mes, inclusive, do seguinte curso académico.
  
• Os pais do causante sempre que non exista cónxuxe viúvo, parella de feito ou fillos con dereito a pensión, no momento do falecemento. Ademais esíxese que os pais convivisen co causante e dependesen economicamente del no devandito momento.
  

Contía: tripla do IPREM vixente en cada momento e que para o ano 2026 equivale:

desde 1-1-2026 a 1.800 euros

Cando concorran varios familiares beneficiarios da pensión extraordinaria, a contía sinalada distribuirase entre eles a partes iguais. Non obstante o anterior, se concorren cónxuxe ou parella de feito e fillos, a pensión distribuirase por metades, correspondendo unha ao cónxuxe ou parella de feito e a outra entre os fillos.

Efectos económicos: Primeiro día do mes seguinte ao falecemento do causante da pensión, sempre que se formulase a solicitude de pensión dentro do período dun ano contado desde o falecemento. Se a solicitude se formula transcorrido ese ano, os efectos económicos produciranse a partir do primeiro día do mes seguinte á solicitude.

A) Pensións de xubilación ou retiro (por incapacidade/inutilidade permanente para o servizo)

Contía: é o 200 por 100 do haber regulador que corresponda ao grupo de clasificación asignado ao Corpo ao que pertenza o funcionario no momento do seu cesamento no servizo activo.

Efectos económicos: primeiro día do mes seguinte á data da xubilación ou retiro, salvo que se trate de persoal xubilado ou retirado, nese caso os efectos serán desde o primeiro día do mes seguinte á data do acto de terrorismo que motivou a inutilidade daquel.

B) Pensións familiares: viuvez, orfandade e en favor de pais.
Son causadas polos funcionarios ou persoal xubilado ou retirado que faleza como consecuencia de actos de terrorismo, así como por quen tiver recoñecida unha pensión extraordinaria por actos de terrorismo de xubilación ou retiro por incapacidade/inutilidade permanente para o servizo, calquera que sexa a causa do seu falecemento.

Os requisitos e condicións para ser beneficiarios destas pensións son os mesmos que os establecidos para as pensións ordinarias de Clases Pasivas, coa particularidade de que os fillos con dereito a pensión son os menores de 23 anos e os incapacitados para todo traballo desde antes do cumprimento da devandita idade ou da data do falecemento do causante. Se o orfo maior de 23 anos se incapacitase para todo traballo antes de cumprir os 25 anos de idade terá dereito á pensión de orfandade con carácter permanente

Contía: é o 200 por 100 do haber regulador que corresponda ao grupo ou subgrupo de clasificación asignado ao Corpo que pertenza o funcionario no momento do seu cesamento no servizo activo. Cando concorran varios beneficiarios a pensión distribuirase da seguinte maneira:

• Se concorren cónxuxe, excónxuxe ou parella de feito e fillos, a metade será para o cónxuxe, excónxuxe ou parella de feito e a outra metade para os fillos a partes iguais.
  
• Se concorren pai e nai, a partes iguais. Os pais só teñen dereito en defecto de cónxuxe, excónxuxe ou parella de feito e fillos con dereito a pensión.
  
• Cando un copartícipe perda o dereito, a súa parte incrementará a do resto deles.