Renda activa de inserción

Poderán ser beneficiarios os traballadores do Mar que teñan suspendida unha RAI recoñecida antes do 1/11/2024, sempre que non teñan dereito a unha prestación ou subsidio por desemprego, acrediten carencia de rendas, de calquera natureza, superiores en cómputo mensual ao 75 % do Salario Mínimo Interprofesional, excluída a parte proporcional das pagas extraordinarias, e:

• No caso de cesamento no traballo por conta allea a tempo completo recuperarase de oficio a percepción da renda activa de inserción, sempre que o traballador figure inscrito como demandante de emprego, o que implicará a reactivación do acordo de actividade, e que a Entidade Xestora teña constancia da involuntariedade do cesamento, ou, noutro caso, esixirase a acreditación dos requisitos.

• No caso de cesamento no traballo por conta propia, requírese a acreditación da involuntariedade do cesamento, inscrición como demandante de emprego e reactivación do acordo de actividade.
• No caso de volver reunir o requisito de carencia de rendas individuais ou da unidade familiar, se acredita que volve reunir o devandito requisito e o solicita dentro do prazo de seis meses desde a data de baixa no programa, previa inscrición como demandante de emprego e reactivación do acordo de actividade.

• No caso de retorno do estranxeiro, cando o interesado solicite a reincorporación ao programa nos 15 días seguintes ao retorno, previa inscrición como demandante de emprego, reactivación do acordo de actividade e acreditar que o traslado se realizou para a procura ou realización de traballo ou perfeccionamento profesional ou cooperación internacional por un período inferior a seis meses.
  

Para ser beneficiarios da reincorporación ao programa, os traballadores, ademais de reunir os requisitos establecidos, deberán solicitalo e reactivar o acordo de actividade.

A solicitude de reincorporación deberase presentar presencialmente en calquera Centro do Instituto Social da Mariña ou ben a través da Sede Electrónica do ISM na seguinte ligazón: Cidadáns

Unha vez reincorporado ao programa, o beneficiario ten dereito a percibir a renda e a participar e beneficiarse das seguintes actuacións durante todo o tempo de permanencia neste:

• Titoría individualizada.
• Itinerario de inserción laboral.
• Entrevista profesional polo titor para definir o seu perfil profesional.
• Elaboración dun plan persoal de inserción laboral. Determinación dun calendario e actividades a desenvolver.
• Xestión de ofertas de colocación.
• Incorporación a plans de emprego e/ou formación.
• Incorporación a accións de voluntariado.

A contía da renda é do 80 % do Indicador Público de Renda de Efectos Múltiples (IPREM) mensual vixente en cada momento.

Durante a percepción da Renda Activa de Inserción o Servizo Público de Emprego Estatal ingresará as cotizacións á Seguridade Social correspondentes ás prestacións de asistencia sanitaria e, se é o caso, protección á familia.

As vítimas da violencia de xénero ou vítimas de violencia doméstica que se viron obrigadas e acrediten cambio da súa residencia durante a súa permanencia neste, poderán percibir nun pagamento único unha axuda suplementaria de tres meses de renda activa de inserción sen que iso minore a duración da devandita renda. Esta axuda poderase percibir unha soa vez por cada dereito á admisión ao programa de renda activa de inserción.

Os traballadores admitidos ao Programa que realicen un traballo por conta propia ou por conta allea a tempo completo, percibirán unha axuda equivalente ao 25 por 100 da contía da renda durante un máximo de 180 días, con independencia do número de contratos de traballo ou actividades por conta propia realizadas. A percepción da axuda non minorará a duración da renda activa de inserción.

• No caso de cesamento no traballo por conta allea a tempo completo, devindícase desde o día seguinte ao cesamento no traballo se o interesado figura inscrito como demandante de emprego á data da extinción do contrato ou se se inscribe dentro do prazo dos 15 días seguintes ao de extinción do contrato de traballo. Se se inscribe fóra do prazo sinalado o nacemento do dereito será desde o día da inscrición como demandante sen desconto de días consumidos por fóra prazo.
• No caso de cesamento no traballo por conta propia, devindícase desde o día seguinte ao cesamento no traballo, cando o interesado solicite a reincorporación ao programa nos 15 días seguintes ao cesamento no traballo. Solicitado fóra do prazo sinalado perderanse tantos días de renda e cotización á seguridade social como medien entre o día seguinte ao do cesamento no traballo por conta propia e o día da solicitude.
• No caso de volver reunir o requisito de carencia de rendas individuais ou da unidade familiar, devindícase a partir do día seguinte á solicitude cando o interesado solicite a reincorporación ao programa, se o solicita dentro do prazo de seis meses desde a data de baixa no programa.
• No caso de retorno do estranxeiro, devindícase desde o día seguinte ao retorno, cando o interesado solicite a reincorporación ao programa nos 15 días seguintes ao retorno. Solicitado fóra do prazo sinalado perderanse tantos días de renda e cotización á seguridade social como medien entre o día seguinte ao retorno e o día da solicitude.

A duración máxima da renda é de once meses.

Causarán baixa definitiva no Programa os traballadores incorporados a este que cometan algún dos feitos seguintes:

• Incumprimento das obrigacións que impliquen o compromiso de actividade e que se concretan no Plan persoal de inserción laboral, salvo causa xustificada.
• Non comparecer, previo requirimento, ante o Servizo Público de Emprego Estatal ou ante os Servizos Públicos de Emprego, non renovar a demanda de emprego na forma e datas que se determinen no documento de renovación da demanda, ou non devolverlles no prazo aos Servizos Públicos de Emprego o correspondente xustificante de que compareceu no lugar e data indicados para cubrir as ofertas de emprego facilitadas polos devanditos servizos, salvo causa xustificada.
• Rexeitamento dunha oferta de colocación adecuada ou de participar en programas de emprego ou en accións de inserción, orientación, promoción, formación ou reconversión profesionais, salvo causa xustificada.
• Traballo por conta propia ou allea a tempo completo, por un período igual ou superior a seis meses.
• Obter pensións ou prestacións de carácter económico da Seguridade Social que sexan incompatibles co traballo ou que, sen selo, excedan na súa contía dos límites que se fixan para poder percibir a renda activa de inserción, ademais de obter axudas sociais como vítima de violencia de xénero que non poida participar en programas de emprego.
• Deixar de reunir o requisito de carencia de rendas por un período superior a seis meses.
• Acceder a unha prestación por desemprego, a un subsidio por desemprego ou á renda agraria.
• Traslado ao estranxeiro, agás no suposto de realización de traballo ou perfeccionamento profesional por un período inferior a seis meses.
• Renuncia voluntaria á renda activa de inserción.
• Obter ou manter indebidamente a percepción da renda activa de inserción.
• Esgotar o prazo máximo de duración da renda activa de inserción.

Causarase baixa temporal no desenvolvemento do programa nos seguintes supostos:

• O traballo por conta allea a tempo completo por un período inferior a seis meses.
• O traballo por conta propia por un período inferior a seis meses.
• A superación do límite de rendas, por un período inferior a seis meses.
• O traslado ao estranxeiro para a procura ou realización de traballo ou perfeccionamento profesional ou cooperación internacional por un período inferior a seis meses.
• Non terá consideración de traslado de residencia a saída ao estranxeiro por tempo non superior a 15 días naturais por unha soa vez ao ano, sen prexuízo de que o beneficiario estea obrigado a comunicar esa situación.

• Solicitude oficial de reincorporación.
• Identificación do solicitante e fillos.
• Xustificante, se é o caso, dos ingresos obtidos no mes anterior á solicitude polo solicitante, cónxuxe e fillos.
• Calquera outro que, de acordo coa normativa vixente, indique o Centro do ISM como necesario para o acceso ao programa de renda activa de inserción en cada caso particular.