O Instituto Social da Mariña reserva a posibilidade de modificar o número e tipo dos cursos incluídos no Plan de Formación 2024 cando concorran circunstancias que así o aconsellen e xustifiquen e que non puidesen terse en conta no momento de elaborar e aprobar o devandito Plan.

Os datos relativos ao número de horas lectivas e número de vacantes dispoñibles (número de alumnos e alumnas) consignados para cada un dos cursos incluídos no Plan de Formación 2024 son orientativos, indicándose igualmente que os requisitos de acceso ás accións formativas poden ser modificados polo Instituto Social da Mariña,  en cuxo caso poderá solicitarse a acreditación dos novos requisitos antes de pasar á fase de preselección.

As datas de impartición dos cursos incluídos neste Plan de Formación, adecuaranse ás necesidades e dispoñibilidade dos traballadores e traballadoras do mar.
As persoas interesadas en solicitar a súa participación nalgún estes cursos poderán dirixirse á dirección provincial ou local do Instituto Social da Mariña máis próxima ao seu domicilio onde se lles indicarán as datas das distintas edicións de cada tipo de curso.

Con carácter xeral, as accións formativas que imparta o ISM realizaranse o máis preto posible á localidade de residencia dos seus beneficiarios.
A asistencia aos cursos (docencia) incluídos nos plans anuais do ISM non levará consigo gasto ningún para os seus beneficiarios/as.
Respecto aos gastos de desprazamento, aloxamento e manutención nos que poida incorrer o alumno ou alumna que finalizase a acción formativa ou que, por causas xustificadas, non puidese iniciala ou tivese que abandonala, o ISM asumirá os seguintes gastos nos termos regulados nos artigos 27, 28 e 29 do Real Decreto 292/2018, do 18 de maio, e no artigo 4 da Orde TMS/693/2018, do 28 de xuño:

a) Gastos de desprazamento e de manutención cando a distancia entre a localidade de residencia do alumno ou alumna e a localidade na que se sitúa o centro de formación sexa igual ou superior a 30 quilómetros.

b) Gastos de desprazamento, manutención e aloxamento cando a distancia entre a localidade de residencia do alumno/alumna e a localidade na que se sitúa o centro de formación sexa igual ou superior a 50 quilómetros.

Os alumnos e alumnas asistentes ás accións formativas do Instituto Social da Mariña, antes de confirmar a súa asistencia a estas, deben coñecer cales son os seus dereitos e obrigas (artigo 14 do Real Decreto 292/2018, do 18 de maio), así como:

• Os efectos que lles serían aplicables no caso de incorrer nos incumprimentos do artigo 16 do devandito real decreto.
• As medidas disciplinarias que se lles aplicarían pola comisión de infraccións das normas de convivencia durante as accións formativas que se desenvolvan tanto con medios propios, contratados, a través de encargos a medios propios personificados ou por calquera outro medio previsto na lexislación vixente, ou durante a súa estancia nas residencias dos Centros Nacionais de Formación do ISM e Direccións Provinciais (artigos 18 a 26 do Real Decreto 292/2018, do 18 de maio).

A selección de asistentes aos cursos farase nos termos establecidos no artigo 12 do Real Decreto 292/2018, do 18 de maio, seguindo o procedemento do seu artigo 13.

Os interesados e interesadas deberán formalizar unha solicitude, con validez en todo o territorio nacional e a vixencia que se determine, debidamente cuberta e asinada para cada tipo de curso, utilizando o modelo oficial vixente, que poderán obter directamente nas direccións provinciais ou locais do Instituto Social da Mariña ou descargar desta páxina web, (solicitude) nos termos establecidos nos artigos 9 e 10 do Real Decreto 292/2018, do 18 de maio, polo que se regula o procedemento de acceso e o réxime de prestación da formación profesional marítima e sanitaria do Instituto Social da Mariña, e a Orde TMS/693/2018, do 28 de xuño, pola que se desenvolve o Real Decreto 292/2018, achegando a documentación recollida nas citadas normas.

Cada solicitante de formación profesional marítima e sanitaria do Instituto Social da Mariña poderá presentar e manter vixentes un máximo de cinco solicitudes.

As solicitudes poderanse presentar:

• En calquera das direccións provinciais e locais do ISM.
• A través da Sede Electrónica da Secretaría de Estado da Seguridade Social.
• En calquera dos lugares recollidos no artigo 16.4 da Lei 39/2015, do 1 de outubro, sobre Procedemento Administrativo Común das Administracións Públicas.

Coa finalidade de orientar e xestionar o acceso á formación profesional marítima e sanitaria, o Instituto Social da Mariña dispón dunha ampla rede de oficinas de atención ao público nas direccións locais e provinciais e locais, nas que persoal técnico cualificado proporcionará a información e o asesoramento necesarios.

Ademais de cumprirse a condición de beneficiario na data de presentación da solicitude, tamén deberán acreditarse, na devandita data, os requisitos esixidos polo Instituto Social da Mariña para acceder ao tipo de curso que se solicite.

Poderán ser beneficiarios/as da formación profesional marítima e sanitaria:

• Os traballadores e traballadoras de nacionalidade española ou nacionais dun estado membro da Unión Europea ou do Espazo Económico Europeo que residan en España e os estranxeiros que conten con permiso de traballo e residencia en vigor, que estean afiliados e en situación de alta ou asimilada á alta, incluídos os traballadores fixos descontinuos, no Réxime Especial da Seguridade Social dos Traballadores do Mar no momento da presentación da solicitude.
• Os e as solicitantes de admisión a un curso do ISM sen incluír no apartado anterior, que no momento de presentar a solicitude sexan demandantes dunha ocupación do sector marítimo pesqueiro.