A partir do 28 de decembro de 2022, e durante un período de 3 anos, estableceuse a compatibilidade da actividade desempeñada por determinados facultativos médicos coa percepción dunha porcentaxe da pensión contributiva de xubilación, deste xeito:

• Os facultativos de atención primaria, médicos de familia e pediatras, adscritos ao Sistema Nacional de Saúde con nomeamento estatutario ou funcionario poderán continuar a desempeñar as súas funcións durante a prórroga no servizo activo e, simultaneamente acceder á xubilación percibindo o 75% do importe da pensión de xubilación.
• Tamén poderán acceder a esta compatibilidade os facultativos de atención primaria adscritos ao sistema nacional de saúde con nomeamento estatutario ou funcionario que accedesen á pensión contributiva de xubilación e se reincorporen ao servizo activo, sempre que o feito causante da devandita pensión tivese lugar a partir do 1 de xaneiro de 2022 ou se acollesen no seu día á compatibilidade da pensión de xubilación co nomeamento como persoal estatutario ou funcionario das e dos profesionais sanitarios, realizado ao abeiro do Real Decreto-Lei 8/2021, do 4 de maio.

Para poder acollerse á presente compatibilidade esixiranse os seguintes requisitos:

1. O acceso á pensión debería ter lugar unha vez chegase á idade que en cada caso resulte de aplicación, segundo o establecido no artigo 205.1.a) do texto refundido da Lei Xeral da Seguridade Social, aprobado por Real Decreto Lexislativo 8/2015, sen que, para tales efectos, sexan admisibles xubilacións acollidas a bonificacións ou anticipacións da idade de xubilación que puidesen ser de aplicación ao interesado.

   O previsto no parágrafo anterior non será de aplicación aos facultativos médicos que se acollesen no seu día á compatibilidade da pensión de xubilación co nomeamento como persoal estatutario ou funcionario das e dos profesionais sanitarios, realizado ao abeiro do Real Decreto-Lei 8/2021, do 4 de maio.

2. A compatibilidade aplicarase en caso de xornada a tempo completo, así como en caso de xornada parcial sempre que a redución de xornada sexa, en todo caso, do 50% respecto da xornada dun traballador a tempo completo comparable.
3. O beneficiario terá dereito aos complementos para pensións inferiores á mínima durante o tempo no que compatibilice a pensión coas súas funcións, sempre que reúna os requisitos establecidos para iso.
4. A percepción do complemento por demora da pensión de xubilación é compatible co acceso á presente compatibilidade, sen que o seu importe sexa minorado.
5. Non poderá acollerse a esta modalidade de compatibilidade o beneficiario dunha pensión contributiva de xubilación da Seguridade Social que, ademais de desenvolver as funcións como facultativos médicos de atención primaria, realice calquera outro traballo por conta allea ou por conta propia que dea lugar á súa inclusión no campo de aplicación do Réxime Xeral ou dalgún dos réximes especiais da Seguridade Social.

• Nestes casos, o beneficiario terá a consideración de pensionista para todos os efectos.

• A realización do traballo compatible coa pensión de xubilación esixe o cumprimento das obrigas de afiliación, alta, baixa e variación de datos prevista no artigo 16 do texto refundido da Lei Xeral da Seguridade Social e a obriga de cotizar nos termos dos artigos 18 e 19 do mesmo texto legal, non sendo de aplicación o disposto no seu artigo 153.

• Durante a realización do traballo compatible estarán protexidos fronte a todas as continxencias comúns e profesionais, sempre que reúnan os requisitos necesarios para causalas, sendo de aplicación o réxime de limitación das pensións, incompatibilidades e o exercicio do dereito de opción, previstos no texto refundido da Lei Xeral da Seguridade Social.

Non se requirirá período mínimo de cotización para acceder ao subsidio por incapacidade temporal derivada de enfermidade común. Se durante o período de compatibilización se iniciase un proceso de incapacidade temporal, suspenderase o aboamento da pensión de xubilación o día primeiro do mes seguinte o da baixa médica, continuándose o día primeiro do mes seguinte ao da alta médica. O establecido anteriormente aplicarase igualmente nos supostos de recaída.

• Unha vez finalizado o traballo compatible, as cotizacións realizadas durante esta situación poderán dar lugar á modificación da porcentaxe aplicable á base reguladora da pensión de xubilación, a cal permanecerá inalterable.

• Así mesmo, as cotizacións indicadas producirán efectos para diminuír ou, no seu defecto, suprimir, o coeficiente redutor que se aplicase, no momento de causar dereito á pensión, a aqueles facultativos médicos que se acollesen no seu día á compatibilidade da pensión de xubilación co nomeamento como persoal estatutario ou funcionario ao abeiro do Real Decreto-Lei 8/2021, do 4 de maio.

• Estas cotizacións non farán efecto en relación co complemento previsto no artigo 210.2 do texto refundido da Lei Xeral da Seguridade Social e na disposición adicional décimo sétima do texto refundido de Lei de Clases Pasivas do Estado.