Revalorización de pensións

De conformidade coas precisións contidas no Real decreto-lei 9/2024 polo que se adoptan medidas urxentes en materia económica, tributaria, de transporte e de Seguridade Social e se prorrogan determinadas medidas para facer fronte a situacións de vulnerabilidade social, establécese que en tanto se aprobe a Lei de Orzamentos Xerais do Estado para o ano 2025, aplicaranse as seguintes normas para a revalorización de pensións e outras prestacións públicas:

As pensións aboadas polo sistema da Seguridade Social, na súa modalidade contributiva, así como as pensións ordinarias e extraordinarias do Réxime Especial de Clases Pasivas do Estado revalorizaranse en 2025 con carácter xeral o 2,8 por cento respecto do importe que tivesen a 31 de decembro de 2024.

Cando o importe das citadas pensións, concorrentes e non concorrentes con outras, estivese limitado ao 31 de decembro de 2024 á contía máxima establecida para ese ano, a porcentaxe do 2,8 % aplicarase sobre a citada contía máxima.

As prestacións de orfandade causadas por violencia contra a muller, previstas no terceiro parágrafo do artigo 224.1 do texto refundido da Lei Xeral da Seguridade Social, experimentarán en 2025 un incremento igual ao que se aprobe para o salario mínimo interprofesional para o devandito ano.

Importe da revalorización:

As pensións de incapacidade permanente, xubilación, viuvez, orfandade e en favor de familiares do sistema da Seguridade Social na súa modalidade contributiva, causadas con anterioridade ao 1 de xaneiro de 2025 e non concorrentes con outras, revalorizaranse o 2,8 %.
O importe da pensión, unha vez revalorizada, estará limitado á cantidade de 3.267,60 euros, entendendo esta cantidade referida ao importe dunha mensualidade ordinaria, sen prexuízo das pagas extraordinarias que puidesen corresponder. O devandito límite mensual será obxecto de adecuación naqueles supostos en que o pensionista teña dereito ou non a percibir 14 pagas ao ano, comprendidas nun ou outro caso, as pagas extraordinarias, para os efectos de que a contía non supere ou poida alcanzar, respectivamente, 45.746,40 euros, en cómputo anual.
O complemento de pensións contributivas do sistema e das pensións de Clases Pasivas para a redución de fenda de xénero terá para 2025 un importe de 35,90 euros.
As pensións non contributivas do sistema da Seguridade Social de invalidez e xubilación terán un importe anual de 7.905,80 euros.
Con efectos do 1 de xaneiro de 2025, a contía anual das prestacións familiares da Seguridade Social, na súa modalidade non contributiva, por fillo a cargo con 18 anos ou máis, e un grao de discapacidade maior do 65 % fíxase en 5.805,60 euros. Se a discapacidade é maior ou igual ao 75 % a contía anual será de 8.707,20 euros.
O subsidio de mobilidade e compensación para gastos de transporte revalorizarase en 2025 nunha porcentaxe do 2,8 %, alcanzando un importe anual de 1.002,00 euros.
O límite de ingresos para o recoñecemento de complementos económicos para mínimos experimentará un incremento do 2,8 % sobre o límite vixente en 2024.

Aplicación da revalorización:

A revalorización aplicarase ao importe mensual que tivese a pensión de que se trate o 31 de decembro de 2024, excluídos os conceptos que a continuación se enumeran:

Os complementos recoñecidos para alcanzar os mínimos establecidos con anterioridade.
A recarga de prestacións económicas por falta de medidas de seguridade e hixiene no traballo.
As percepcións de rendas temporais por cargas familiares e a indemnización suplementaria para a provisión e renovación de aparellos de prótese e ortopedia, no suposto de pensións do extinguido seguro de accidentes de traballo e enfermidades profesionais.

Pensións do SOVI:

As pensións do extinguido Seguro Obrigatorio de Vellez e Invalidez (SOVI) non concorrentes con outras pensións públicas terán un importe anual de 7.840,00 euros en 2025, de acordo co establecido no apartado 1 e no apartado 4 da disposición transitoria segunda do texto refundido da Lei Xeral da Seguridade Social. As pensións do SOVI concorrentes con pensións de viuvez dalgún dos réximes do sistema da Seguridade Social terán en 2025 un importe anual de 7.610,40 euros, sen prexuízo da aplicación do límite establecido na disposición transitoria segunda do texto refundido da Lei Xeral da Seguridade Social. No caso de superarse o devandito límite, o aludido importe minorarase na contía necesaria para non superalo. Non se considerarán pensións concorrentes a prestación económica recoñecida ao abeiro da Lei 3/2005, do 18 de marzo, nin a pensión percibida polos mutilados útiles ou incapacitados de primeiro grao por causa da pasada guerra civil española, calquera que fose a lexislación reguladora, nin o subsidio por axuda de terceira persoa previsto no texto refundido da Lei Xeral de dereitos das persoas con discapacidade e da súa inclusión social, aprobado polo Real decreto lexislativo 1/2013, do 29 de novembro, nin as pensións extraordinarias derivadas de actos de terrorismo.
A revalorización establecida no apartado anterior non ten carácter consolidable.