Onuradunak / Kontratuak

Besteren konturako langileek, Gizarte Segurantzaren edozein Erregimenetan barne hartutakoek eta bazkide langileek edo kooperatibetako lan bazkideek GSLOren 215.artikuluan ezarritako baldintzetan,  Gizarte Segurantzaren ordaindutakoaren araberako erretiroagatiko pentsioa jasotzeko eskubidea izateko ezarritako gainerako baldintzak betetzen badituzte, erretiro partziala hartu ahal izango dute honako baldintza hauetan:

Erretiro partziala errelebo kontraturik gabe:

• Gutxieneko adina: kasu bakoitzean aplikatu beharreko erretiro-adin arrunta (benetako urteak, erretiro-adinaren murrizte-koefizienteak aplikatu gabe).

• Lanaldi osoko edo lanaldi partzialeko kontratua izan dezakete.

• Lanaldiaren  murrizketa: gutxienez %25 eta gehienez % 75 murriztu ahal izango da.
  

• Gutxieneko kotizazio epea: 15 urte, eta horietatik 2 gertaera eragilearen aurreko 15 urteen barruan sartuta egon beharko dira.

• Enpresako antzinatasuna: ez da eskatzen.

• Errelebo kontratua: ez da eskatzen.
  

Erretiro partziala errelebo kontratuarekin:

Baldin  eta aldi berean errelebo-kontratu bat egiten bada Langileen Estatutuaren (LE) 12.6 artikuluan aurreikusitako moduan, lanaldi osoko langileek erretiro partziala hartu ahal izango dute baldintza hauek betetzen badituzte:

• Lanaldi osoko kontratua izan beharko dute. 

• Aldi berean errelebo-kontratu mugagabea eta lanaldi osokoa egitea.

• Gutxieneko adina (erretiro-adinaren murrizketarik gabe): gertaera eragilearen egunean, kasu bakoitzean aplikatu beharreko erretiro-adin arrunta baino gehienez hiru urte gutxiago beteta izatea.
• Lanaldi-murrizketa:

  • Gutxienez %25ekoa eta gehienez %75ekoa izango da. Portzentaje horiek konpara daitekeen lanaldi osoko langile baten lanaldiari dagokionez ulertuko dira.

    Erretiro partziala ohiko erretiro-adinekiko bi urte baino lehenago hartzen bada, lehenengo urteko lanaldi-murrizketa ehuneko 20 eta 33 artekoa izango da. Kasu horietan, bigarren urtetik aurrera, alderdiek lanaldiaren murrizketa aldatu ahal izango dute, aurreko paragrafoan ezarritako tarteen barruan.

  • Laugarren xedapen iragankorra, 5. atala aplikagarria den kasuetan, lanaldi murrizketa gutxienez % 25ekoa eta gehienez % 75ekoa, edo % 85ekoa izango da errelebo kontratua mugagabea eta lanaldi osokoa bada.

• Gutxieneko kotizazio epea:
  
  • 33 urteko kotizazio efektiboak, aparteko ordainsarien zati proportzionala kontuan hartu gabe. Soilik ondorio horietarako, nahitaezko soldadutza aldia edo ordezko gizarte prestazioaren aldia, edo emakumezkoen nahitaezko zerbitzu soziala, zenbatuko da, urtebeteko gehienezko mugarekin.
    
  • 30 urte kotizatuta izatea, aparteko ordainsarien zati proportzionala eta nahitaezko soldadutza edo ordezko gizarte prestazio aldia kontuan hartu ahal izan gabe, laugarren xedapen iragankorra, 5. atala, aplikagarri zaienentzat.
    
  • 25 urte, % 33ko desgaitasun maila edo handiagoa duten pertsonen kasuan, 2013- 01-01etik aurrera.
    
• Enpresako antzinatasuna: gutxienez, 6 urte erretiro partzialaren dataren aurreko berehalakoak izango dira. Xede horrekin, LEren 44. artikuluan aurreikusitako baldintzatan enpresaren ondorengotza egon bada, enpresan edo talde bereko kide diren enpresetan izan duen antzinatasuna zenbatuko da.
  
• Erretiro partzialeko kotizazioa:

laugarren xedapen iragankorra, 5. atala aplikagarri ez den kasuetan, erretiro partzialak dirauen bitartean, enpresak eta langileak, hala badagokio, langileak lanaldi osoan lanean jarraituz gero legokiokeen kotizazio oinarria kotizatuko dute.

Erretiratu behar den langilearen lanaldi partzialeko kontratuaren berezitasunak:

• Idatziz eta eredu ofizialean formalizatuko da.

• Kontratuan agertu beharko dira lanaldi partzialeko kontratuaren osagaiak, bai eta langileak lehen egiten zuen lanaldia eta lanaldi murrizketaren ondorioz sortzen dena ere. 

• Kontratua egiteak ez du ekarriko langileari dagozkion eskuratutako eskubideak eta antzinatasuna galtzea.

Errelebo-kontratuaren berezitasunak:

• Idatziz formalizatuko da, eredu ofizialean, eta bertan nahitaez jaso beharko dira ordeztutako langilearen izena, adina eta inguruabar profesionalak, bai eta errelebistak beteko duen lanpostuaren ezaugarriak ere.
• Erretiro partziala hartzen duenak erretiroa hartzeko adin arruntera iritsi baino lehen hartzen duenean erretiro partziala, enpresak errelebo-kontratu mugagabea eta lanaldi osokoa hitzartu beharko du aldi berean. 

• Aurreko bi kasuetan, erreleboa hartzen duen langilearen lan-ordutegiak ordeztutako langilearena osatu ahal izango du, edo harekin batera lan egin.