Informazio orokorra

Hitzarmena honako prestazio hauei aplikatzen zaie:

Espainiari dagokionez:

Gizarte Segurantzako Sistemaren honako prestazio ekonomiko hauei:

• Gaixotasun arruntaren eta lanekoa ez den istripuaren ondoriozko aldi baterako ezgaitasunagatiko prestazioak.
• Amatasunagatiko eta haurdunaldiko arriskuagatiko prestazioak.
• Ezgaitasun iraunkorragatiko, erretiroagatiko eta heriotza eta biziraupenagatiko prestazioak.
• Lan istripuagatiko eta lanbide gaixotasunagatiko prestazioak.

Filipinei dagokienez:

Honako prestazio ekonomiko hauei:

• Amatasunagatiko eta gaixotasunagatiko prestazioak.
• Erretiroagatiko prestazioak.
• Baliaezintasunagatiko prestazioak.
• Heriotza eta biziraupenagatiko prestazioak.
• Lan istripuagatiko eta lanbide gaixotasunagatiko prestazioak.

Prestazio horiei dagokienez, kontuan hartu behar da honako hau:

• Hitzarmenean aurreikusitako ordaindutakoaren araberako prestazioak jasotzeko, Espainian eta Filipinetan betetako aseguru aldiak batu daitezke.
• Ordaindutakoaren araberako prestazio ekonomikoak jasotzeko, ez da kontuan hartuko interesduna Espainian edo Filipinetan bizi den edo bertan dagoen; aldi baterako ezgaitasunagatiko prestazioak eta ordaindutakoaren araberakoak ez diren prestazioak, ordea, ez dira ordainduko onuraduna beste herrialde batean bizi bada.
• Herrialde bakoitzak bere prestazioak ordainduko dizkio zuzenean onuradunari.
• Bi herrialdeetako legeriek ordaindutakoaren araberako pentsioa jasotzeko eskubidea izateko ezarritako baldintzak betetzen dituzten pertsonek ordaindutakoaren araberako pentsioa jaso ahal izango dute herrialde horietako bakoitzean.

Aldi baterako ezgaitasuna, eta amatasuna eta haurdunaldiko arriskua

Prestazio ekonomikoak onuraduna aseguratua dagoen herrialdeak onartzen ditu, behar izanez gero, beharrezkoa bada beste herrialdeko aseguru aldia kontuan izanda, gainjartzen ez diren bitartean.

Baliaezintasuna, Erretiroa eta Biziraupena

Herrialde bakoitzak bereiz aztertuko du pentsio eskaera, era honetan:

• Interesdunak prestazioa jasotzeko eskubidea duen egiaztatuko da, soilik bertako aseguru aldiak kontuan hartuta, beste herrialdekoak batu gabe.
• Halaber, prestazioa kalkulatuko da, bertako aseguru aldiei beste herrialdean egiaztatutakoak batuta (pentsio teorikoa). Kasu honetan, prestazioaren zenbatekoa ez da osoa izango, baizik eta ematen duen herrialdean betetako aseguru aldien artean dagoen proportzioaren eta Espainiako eta Filipinetako aldien baturaren araberakoa (hainbanako pentsioa).

Salbuespen bat dago bi herrialdeetako batean egiaztatutako aseguru aldien guztizko iraupena urtebetetik beherakoa den kasuetarako eta beren aldetik herrialde horretan pentsioa jasotzeko eskubidea ematen ez duten kasuetarako. Behar izanez gero, beste herrialdeak beretzat hartuko ditu, baina "prorrata temporis" klausula aplikatu gabe.

Bi herrialdeetako batean egiaztatutako aseguru aldiak ez badira urtebetera iristen, horiek interesdunak prestazioa jasotzeko baldintzak biltzen dituen herrialdek batuko ditu, kasu horretan, "prorrata temporis" klausula aplikatuz.

Aurreko ataletan adierazitakoaren arabera kalkulatutako prestazioak alderatuko dira, eta herrialde bakoitzak interesdunarentzat mesedegarriena den prestazioa aitortu eta ordainduko du.

Pentsioa aitortzeko eta kalkulatzeko, honako hau hartuko da kontuan:

Herrialdeetako bateko legediak prestazio osoa onartzeko aseguru aldien gehienezko iraupena eskatzen badu, haren zenbatekoa aseguru aldien araberakoa dela, herrialde horretako erakunde eskudunak, guztizkoen kasuetan, pentsio hori lortzeko behar diren beste herrialdeko kotizazio aldiak bakarrik hartuko ditu kontuan.

Pentsioa kalkulatzen duen Erakundeak kontuan izango du langilea bere araudiaren mendean dela, beste herrialde batean aseguratua badago edo bere aseguru aldietan oinarrituta herrialde horretako prestazio bat jasotzen badu. Biziraupenagatiko pentsioak aitortzeko, kontuan hartuko da hildakoa beste herrialdean aseguratua ote zegoen edo hango pentsioduna ote zen.

Prestazio bat onartzeko aseguru aldi batzuk ekintza eragilea baino lehen beteta izatea eskatzen bada, baldintza hori ere betetzat joko da interesdunak beste herrialdeko prestazioa onartu aurretik egiaztatzen baditu.

Herrialde sinatzaileren bateko legeriak pentsioa murrizteko, baliogabetzeko edo kentzeko klausulak baldin baditu lan jarduera bat gauzatzen duten pentsiodunentzat, klausula horiek aplikagarriak izango dira lan jarduera hori beste herrialdean gauzatu arren.

Espainiako pentsioa onartzeko Filipinetako aseguru aldiak batu behar izan badira, pentsio horren kalkulua Espainiako Gizarte Segurantzaren azken kotizazioaren ordainketaren aurreko urteetan Espainian asegurudunak egiaztatutako benetako kotizazio oinarrien arabera egingo da. Horrela lortutako zenbatekoa gertaera eragilea gertatu arte mota bereko prestazioetarako urtero ezarritako birbalorizazioen arabera gehituko da.

Zenbait erregimen bereziren onurak jasotzeko (adibidez, Itsasoko langileak, Ikatz Meatzaritza), lanbide edo lan berean bete diren beste herrialdeko aldiak bakarrik hartuko dira kontuan.

Espainiako Gizarte Segurantzaren erretiroagatiko pentsiorako Filipinetan egiaztatutako aseguru aldien guztizkoa zenbatu bada, guztizko zenbaketa hori erabiliko da pentsioa zein adinetan jaso ahal izango den kalkulatzeko.

Istripua gertatutakoan edo lanbide gaixotasunaren arriskupean jarduera gauzatu zueneko garaian langileari zegokion legeria zuen herrialdeak erabakiko du prestazioa.