Información Xeral

O Convenio aplícase ás seguintes prestacións:

En relación con España:

Aplícase ás seguintes prestacións do sistema de Seguridade Social:

• Prestacións económicas por incapacidade temporal en casos de enfermidade común ou accidente non laboral.
• Prestacións económicas de maternidade e risco durante o embarazo.
• Prestacións de incapacidade permanente en casos de enfermidade común ou accidente non laboral, de vellez e morte e supervivencia.
• Prestacións familiares por fillo a cargo.
• Prestacións por desemprego.
• Accidentes de traballo e enfermidades profesionais.

En relación con Australia:

Aplícase ás seguintes prestacións:

• Pensións de vellez.
• Pensión de apoio por discapacidade para os gravemente discapacitados.
• Pensión de esposa.
• Pagamento por coidado.
• Pensións aboables ás persoas viúvas.
• Pensión de orfandade absoluta.
• Contía adicional por fillo.

Respecto a estas prestacións hai que ter en conta que:

• Para adquirir as prestacións de carácter contributivo previstas no Convenio, pódense sumar os períodos de seguro acreditados en España e os de residencia cumpridos en Australia.
• As prestacións económicas, agás as de incapacidade temporal, desemprego, maternidade, risco durante o embarazo e as non contributivas españolas, poderanse percibir con independencia de que o interesado resida ou se encontre en España ou en Australia. Respecto á prestación de orfandade australiana, existen certas restricións para os residentes en España.
• Cada país aboará as súas propias prestacións directamente ao beneficiario. Non obstante, dos primeiros pagamentos da pensión que se lle recoñezan, poderase descontar o importe correspondente a aboamentos de prestacións efectuados en cantidade superior á debida pola Seguridade Social do outro país.
• As persoas que reúnan os requisitos esixidos polas lexislacións de ambos os dous países para ter dereito á pensión, poderán percibila de cada un deles.
• Para as prestacións por fillo non se terán en conta como ingresos as prestacións por fillo recoñecidas no outro país.

Prestacións da Seguridade Social australiana

Para ter dereito a unha prestación australiana, agás para a pensión de orfandade absoluta, se o interesado, ao presentar a solicitude, é residente e se atopa en España, considérase como residente e que se atopa en Australia, se algunha vez foi residente en Australia.

Se non se alcanza dereito á prestación por non cumprir os períodos mínimos de residencia en Australia, para os efectos do cumprimento dos devanditos períodos mínimos, sumaranse os períodos de seguro españois, sempre que non se superpoñan.

A contía calcúlase, en virtude da lexislación australiana, de maneira diferente segundo resida o interesado en Australia ou fóra de Australia:

En Australia:

Se o dereito a pensión australiana só se alcanza en aplicación do Convenio, totalizando períodos de residencia, e ata que se acredite o dereito a esta consonte a lexislación interna australiana, a contía da devandita pensión será calculada segundo a lexislación australiana pero sen tomar en conta para o cómputo dos seus ingresos calquera prestación española que teña dereito a percibir. Agora ben, da contía da prestación australiana que deba serlle aboada, restarase a contía da prestación española que puidese serlle recoñecida.

Fóra de Australia:

Se, segundo a lexislación australiana, lle corresponde unha pensión rateada, para a comprobación de ingresos só se terá en conta unha parte da prestación española. Esa parte calcúlase multiplicando o número total de meses de residencia en Australia desa persoa (sempre que non exceda de 300 meses), polo importe da prestación española, e o resultado divídese por 300. Non se terán en conta as seguintes prestacións españolas: Os complementos ao mínimo das pensións contributivas, as prestacións por fillo a cargo de pensionistas e as prestacións non contributivas.

Prestacións da Seguridade Social española

Incapacidade temporal, Maternidade e risco durante o embarazo.

Para o recoñecemento destas prestacións totalízanse, se fose necesario, os períodos de residencia australianos.

Xubilación, Incapacidade permanente e Morte e Supervivencia

A Institución competente española examinará a solicitude de prestación na forma seguinte:

• Comprobará se o interesado alcanza dereito á pensión tendo en conta exclusivamente os períodos de seguro españois.
• Así mesmo, calculará a prestación sumando aos períodos de seguro propios os de residencia acreditados en Australia (pensión teórica). Neste suposto, o importe da prestación non será íntegro, senón segundo a proporción existente entre os períodos de seguro cumpridos en España e a suma dos períodos de residencia e seguro acreditados en Australia e España respectivamente (pensión pro rata).
• Compararanse as prestacións calculadas segundo o indicado nos apartados anteriores e aboarase a prestación que lle sexa máis favorable ao interesado.

Para o recoñecemento e cálculo da pensión terase en conta:

• Considerarase que, no momento do feito causante, o traballador se encontra sometido á lexislación española se nese momento reside en Australia ou percibe unha prestación australiana causada polo propio beneficiario. O mesmo criterio aplícase para o recoñecemento das prestacións de supervivencia.
• Considérase cumprido o requisito de acreditar períodos de seguro nun tempo determinado, se o interesado acredita períodos de residencia activa laboralmente en Australia de duración equivalente, no período inmediatamente anterior ao recoñecemento da prestación australiana.
• As cláusulas de redución, suspensión ou supresión da pensión, para o caso de pensionistas que exerzan a súa actividade laboral, aplicaránselles a estes pensionistas aínda que esa actividade se efectuase en Australia.
• Se se tomaron períodos de residencia australianos, o cálculo da pensión española efectuarase segundo as bases de cotización reais acreditadas polo asegurado en España durante os anos que precedan inmediatamente o pagamento da última cotización á Seguridade Social española. A contía así obtida incrementarase segundo as revalorizacións establecidas anualmente ata a data do feito causante para as prestacións da mesma natureza.
• Para acceder aos beneficios de determinados réximes especiais (por exemplo, traballadores do Mar, Minaría do Carbón) só se terán en conta os períodos do outro país que se tivesen feito en igual profesión ou emprego.
• No suposto de pensión de xubilación para a que se totalizasen períodos de residencia en Australia, a devandita totalización utilizarase igualmente para determinar a idade na que se pode acceder á pensión.

Accidentes de traballo e enfermidades profesionais

As prestacións aboaranse pola Institución Competente española, se a persoa estaba suxeita á súa lexislación no momento de suceder o accidente ou contraerse a enfermidade profesional e, neste caso, se exerceu unha actividade laboral susceptible de producir esa enfermidade.