A túa vida laboral e bases de cotización

A Tesourería Xeral da Seguridade Social incorporou nova información e servizos en Importass, que se suman aos ofrecidos dende o seu lanzamento, facilitando que consultes de forma máis clara e sinxela a túa información personalizada e obteñas os teus informes.

Ata agora a Tesourería realizaba unha campaña de comunicación de vida laboral e bases de cotización dirixida aos traballadores que cotizaran nalgún período do ano anterior, mediante carta ou SMS no caso daqueles que comunicasen o seu teléfono móbil.

Agora a través do portal podes acceder a esta información en todo momento, dende calquera dispositivo, sen necesidade de desprazarte nin de ter que esperar o envío, coa vantaxe de dispoñer sempre de información actualizada.

Máis información: Importass. A túa vida laboral e bases de cotización.

Que novidades podo encontrar en Importass?

Ata agora dende o portal podías consultar e descargar o informe da túa vida laboral, realizar os teus trámites se es autónomo ou tes unha persoa empregada no teu fogar, coñecer e pagar as túas débedas e modificar os teus datos persoais.

Agora tamén poderás:

Ademais de consultar on line a túa vida laboral, visualizar as túas bases de cotización e descargar os informes.
Ver o detalle da túa alta na Seguridade Social se es traballador autónomo.
Consultar máis información sobre a túa cotización se es traballador por conta allea.
Recibir avisos na túa Área Persoal.

Podo abrir un SMS da Seguridade Social con información sobre a miña vida laboral?

Se recibes a seguinte mensaxe é seguro:

A Tesourería lanzou unha comunicación vía SMS a todos os traballadores que teñen comunicado o seu teléfono móbil, coa finalidade de informar sobre a dispoñibilidade de información sobre a súa vida laboral e bases de cotización en Importass.
Accede á túa área persoal a través do enlace que se facilita, utilizando a opción vía SMS.

Se non proporcionaches o teu teléfono móbil recibirás unha comunicación por carta para informarte sobre como acceder a esta información.

Que necesito para navegar por este Importass?

Para unha mellor experiencia recomendámosche usar os navegadores Google Chrome, Windows Edge ou Mozilla Firefox. Non é recomendable o uso de Internet Explorer.

Para poder acceder á área persoal, consultar información e realizar trámites on line é necesario que dispoñas dalgún medio de identificación. Se comunicaches o teu teléfono móbil á Tesourería podes entrar vía SMS, tamén é posible acceder con Cl@ve ou certificado electrónico.

Se non contas con ningún método de identificación, consulta como podes rexistrarte en Cl@ve ou envía unha solicitude para comunicar o teu teléfono móbil e poder acceder vía SMS.

Como podo acceder ao portal?

Podes acceder ao portal desde a páxina Web da Seguridade Social, desde a Sede Electrónica ou desde a APP da Seguridade Social. En todas elas encontrarás un enlace a Importass.

Que avisos vou ver na miña área persoal?

Engádense avisos á área persoal de Importass coa finalidade de facilitarche información do teu interese. Ademais de mostrarche información sobre a existencia dun borrador dunha alta de fogar non finalizada, visualizarás un aviso se se anula a túa alta no sistema de Seguridade Social ou se tes algunha débeda. Neste último caso dispós dun enlace para consultar a información e poñerte ao día.

E se son traballador autónomo, que me ofrece o portal?

Se traballas por conta propia agora poderás acceder polo miúdo dos teus datos como traballador autónomo, relacionados coa túa alta actual na Seguridade Social: a túa actividade, cota, a entidade aseguradora que elixiches ou que cobre a túa cotización.
Ademais, xa podías acceder a un espazo específico no que se encontran agrupados todos os trámites que podes necesitar, así como a información que podes requirir antes de utilizar calquera servizo. Tamén dispós dunha guía, na que damos resposta ás preguntas que podes formular antes, durante e despois de realizar calquera trámite.

Se son traballador por conta allea, que podo consultar?

Como traballador por conta allea, podes coñecer o detalle dos datos relacionados coa túa actual relación laboral: xornada, tipo de contrato, grupo de cotización, convenio colectivo e entidade aseguradora. Ademais, poderás coñecer a información sobre a última base de cotización dispoñible e a cota que achegas á Seguridade Social cada mes xunto co importe que cotiza por ti a empresa. Dispós dun enlace directo ao informe de consulta de cálculos para coñecer esta información relativa a calquera período anterior.

Que información podo consultar da miña vida laboral e bases de cotización?

Accedendo á túa área persoal podes consultar on line os detalles da túa vida laboral e as túas bases de cotización.

No apartado A túa vida laboral verás os teus períodos de alta e baixa na Seguridade Social, as empresas nas que traballaches, a túa actividade como autónomo e o número de días que estiveches en alta.

No apartado As túas bases de cotización, podes consultar os importes das bases, correspondentes aos períodos nos que estiveches de alta na Seguridade Social, que se terán en conta para o cálculo das túas prestacións.

Podes ademais seleccionar por datas ou empresas os resultados, descargar en calquera momento o informe completo ou adaptado á información que necesites. Ademais, se detectas erros, podes solicitar a incorporación ou corrección de datos.

É posible, se non tes identificación dixital, solicitar o envío destes informes por correo, se o domicilio está actualizado na Tesourería Xeral da Seguridade Social.