Se vas iniciar unha actividade pola túa conta ou xa es traballador autónomo, agora podes realizar os teus trámites de forma segura e sinxela dende Importass. A Tesouraría Xeral da Seguridade Social integra no seu Portal todos os servizos cun novo deseño máis intuitivo, utilizando unha linguaxe doada, acompañando e guiando o traballador en todos os pasos do proceso.

Importass é un espazo dixital adaptado a dispositivos móbiles, accesible dende a Web, a Sede electrónica (SEDESS) e a app da Seguridade Social, no que se ofrece información e servizos de tramitación. Ademais incorpora unha área persoal na que, independentemente da súa situación laboral actual, o cidadán pode consultar os seus datos de forma personalizada.

Tras o seu lanzamento en abril de 2021, fóronse incorporando novos servizos de grande utilidade para os traballadores e, en xeral, para os cidadáns, baixo a premisa de converter o usuario no centro do seu deseño e, polo tanto, conseguir que sexan accesibles, que se entendan, utilicen e valoren.

Os traballadores autónomos foron un colectivo ao que se lle deu prioridade dende a posta en marcha de Importass. Dende o seu inicio abriuse no portal unha páxina específica na que se encontraban agrupados todos os trámites dispoñibles na Sede Electrónica para estes traballadores, así como a información previa que puidese necesitarse antes de utilizar calquera servizo. Tamén se encontraba xa dispoñible unha guía, na que se dá resposta ás preguntas máis frecuentes deste colectivo, que poden xurdir antes, durante e despois de realizar calquera xestión.

Agora complétase a información dispoñible no Portal e adáptanse e redeseñan os servizos co fin de facilitar unha xestión máis segura, sinxela e intuitiva, ao converter os procesos en trámites guiados que conteñen todas as explicacións necesarias en cada paso.

Que novidades podo encontrarme como traballador autónomo no portal?

As principais novidades céntranse no redeseño dos trámites que utilizas habitualmente: alta, baixa, modificacións (da base de cotización, coberturas, Mutua...). Os servizos concibíronse de forma que non sexa necesario que coñezas previamente a lexislación nin os pasos administrativos relacionados.

Isto implica que, ademais de acompañarte e guiarte ao longo do proceso, dispós de explicacións mentres cobres a información sobre o que supón cada unha das túas decisións, así como os teus dereitos e obrigas.
Ademais, introducíronse melloras que simplificarán e farán máis sinxelas as túas xestións:

• Se non dispós de Número de Seguridade Social, obteralo como parte do trámite de alta, evitando que teñas que realizar un trámite previo para a súa obtención.
• Se non finalizas o trámite de alta xerarase un borrador que estará dispoñible durante un prazo de 10 días para que poidas recuperalo.
• Podes programar a túa alta ou baixa como traballador autónomo e cancelalas en caso de que non chegues a iniciar ou finalizar a túa actividade na data informada.
• Poderás consultar e descargar en calquera momento, dende a sección de “O teu arquivo de documentos” da túa Área Persoal do Portal, todos os documentos xerados como consecuencia dos trámites realizados.
• Dende a túa Área Persoal, ademais de acceder polo miúdo dos datos da túa alta actual na Seguridade Social, poderás solicitar modificacións da túa actividade económica, base de cotización, entidade aseguradora e coberturas, domicilio de actividade, ou da conta bancaria para a domiciliación do pagamento das túas cotas.
• Dispoñerás dun simulador no que poderás consultar a cota aproximada que terás que pagar antes de darte de alta.

Como podo acceder ao portal?

Podes acceder ao portal desde a páxina Web da Seguridade Social, desde a Sede Electrónica ou desde a APP da Seguridade Social. En todas elas encontrarás un enlace a Importass.

Que necesito para navegar por este portal?

Para unha mellor experiencia recomendámosche usar os navegadores Google Chrome, Windows Edge ou Mozilla Firefox. Non é recomendable o uso de Internet Explorer.

Para poder acceder á área persoal, consultar información e realizar trámites on line é necesario que dispoñas dalgún medio de identificación. Se comunicaches o teu teléfono móbil á Tesourería podes entrar vía SMS, tamén é posible acceder con Cl@ve ou certificado electrónico.

Se non contas con ningún método de identificación, consulta como podes rexistrarte en Cl@ve ou envía unha solicitude para comunicar o teu teléfono móbil e poder acceder vía SMS.