Contías e pagamentos

A porcentaxe aplicable á base reguladora para o cálculo da pensión é variable en función dos anos de cotización á Seguridade Social, aplicándose unha escala que comeza co 50% aos 15 anos, aumentando a partir do décimo sexto ano un 0,19% por cada mes adicional de cotización, entre os meses 1 e 248, e un 0,18% os que superen o mes 248, sen que a porcentaxe aplicable á base reguladora supere o 100%, agás nos casos en que se acceda á pensión cunha idade superior á que resulte de aplicación.

Ata o 2027, a aplicación destas porcentaxes realízase de forma gradual e paulatina.

A porcentaxe fixada no momento do recoñecemento da pensión de xubilación non sofre variación polo feito de que o beneficiario alcance a idade regulamentaria de xubilación. Non obstante, se ao chegar á citada idade, o importe da pensión fose inferior á pensión mínima establecida para esta, garantiríaselle sempre e cando reunise os requisitos esixidos.

Para os efectos de acreditar o período mínimo de cotización (carencia) esixido para acceder a unha prestación, só se computan, con carácter xeral,  as cotizacións efectivamente realizadas e as asimiladas por pagas extras (son os denominados días-cota).

O tempo de bonificación que se lle concede segundo a idade que tivera o 1-1-1967 non serve para acreditar o período mínimo de cotización esixido, só se terá en conta para a determinación da porcentaxe da pensión.

A contía da pensión será o resultado de aplicarlle a porcentaxe de redución de xornada ao importe da pensión que lle correspondería, segundo os anos cotizados, na data do feito causante.

Para os efectos de determinar a porcentaxe aplicable á base reguladora da pensión de xubilación parcial, cando se acceda a esta antes de facer os 65 anos, non se aplicarán coeficientes redutores en función da idade.

As cotizacións efectuadas nas actividades realizadas durante a suspensión parcial da percepción da pensión de xubilación, producirán efectos para a mellora da pensión, unha vez producido o cesamento no traballo.

Para estes efectos, unha vez comunicado o cesamento na realización das actividades á Entidade xestora competente, restablecerase a percepción íntegra da pensión de xubilación, logo de recálculo da súa contía conforme as regras seguintes:

• Serven para calcular de novo a base reguladora, mediante o cómputo das novas cotizacións e aplicando as normas que estean vixentes no momento do cesamento na actividade. Se o resultado é unha base reguladora inferior á anterior, mantense a fixada anteriormente, aínda que aplicando á pensión resultante as revalorizacións habidas dende a data de determinación da base reguladora ata o cesamento no traballo.
  
• Tamén darán lugar á modificación da porcentaxe aplicable á base reguladora, en función do novo período de cotización acreditado e producirán efectos para diminuír ou, se é o caso, suprimir o coeficiente redutor que se tivese aplicado, no momento de causar o dereito á pensión de xubilación anticipada por ter ou non a condición de mutualista.