R/ Dr. Tolosa Latour, s/n - 28041 - MADRID.
Teléfono: 91 390 28 00.
Que é a Xerencia de Informática da Seguridade Social?
A Xerencia de Informática da Seguridade Social é un servizo común para a xestión e administración das tecnoloxías da información e as comunicacións no sistema de Seguridade Social, con personalidade xurídica propia e plena capacidade de obrar para o cumprimento dos seus fins, dependente do Ministerio de Inclusión, Seguridade Social e Migracións e adscrita á Secretaría de Estado da Seguridade Social e Pensións, con rango de Subdirección Xeral.
Correspóndelle ao Xerente de Informática da Seguridade Social a dirección do servizo común, se ben as actuacións da Xerencia de Informática da Seguridade Social axustaranse ás directrices establecidas polo Consello Xeral de Tecnoloxías da Información e as Comunicacións da Seguridade Social, sen prexuízo das funcións que a normativa vixente atribúe á Comisión Ministerial de Administración Dixital do Ministerio de Inclusión, Seguridade Social e Migracións.
A Xerencia de Informática da Seguridade Social exercerá as competencias establecidas no artigo 5 do Real Decreto 508/2000, do 14 de abril, a través do Centro Informático Contable da Seguridade Social.
No orzamento de gastos da Xerencia de Informática figurará de forma diferenciada a consignación orzamentaria das partidas específicas do Centro Informático Contable da Seguridade Social, e ao mesmo tempo imputaranse todas as adquisicións informáticas correspondentes aos órganos, Entidades Xestoras e Servizos Comúns dos que depende funcionalmente. Ata que se leve a cabo a oportuna separación orzamentaria, o seu orzamento integrarase no da Tesourería Xeral da Seguridade Social, coa debida separación funcional.
Que competencias ten?
- A elaboración e proposición ás Entidades Xestoras, Tesourería Xeral da Seguridade Social e Intervención Xeral da Seguridade Social dos plans directivos de sistemas de tecnoloxías da información e das telecomunicacións, para a súa posterior presentación ante o Consello xeral de tecnoloxías da información e as comunicacións da Seguridade Social.
- A proposta de creación, desenvolvemento e modificación dos sistemas de información.
- A avaliación, auditoría e inventario dos sistemas de información vixentes e a proposta de modificacións a estes, co fin de garantir a súa perfecta coordinación no esquema xeral de actuación.
- A aprobación das normas de carácter técnico e metodolóxico que garantan a homoxeneidade, compatibilidade, interrelación e transmisibilidade de todos os sistemas de información, presentes e futuros, sen prexuízo das competencias da Subsecretaría ao respecto.
- A creación, custodia e administración das bases de datos corporativas do sistema, así como os sistemas de seguridade e de confidencialidade.
- O mantemento e actualización dos medios telemáticos utilizados para a transmisión de información, así como os correspondentes sistemas informáticos.
- O mantemento do inventario de recursos da totalidade dos sistemas de información.
- A formalización de contratos administrativos necesarios para o cumprimento dos seus fins, os expedientes de modificación das relacións de postos de traballo de carácter informático e os plans de formación en tecnoloxías da información e as comunicacións.
- Aqueloutras que lle estean encomendadas ou se lle encomenden no futuro.