Aquelas persoas que inicien a súa actividade por conta propia e tramiten a súa alta, a partir do día 1 de xaneiro de 2023, deberán comunicar todas as actividades que realicen como autónomo á Tesourería Xeral da Seguridade Social.

As persoas que xa figuraran de alta a día 1 de xaneiro de 2023 e realicen máis dunha actividade por conta propia, tamén terán que comunicar todas as súas actividades á Tesourería Xeral da Seguridade Social.

Tanto a alta no Réxime Especial de Traballadores Autónomos, coma a comunicación das devanditas actividades, poderanse realizar a través de Importass, Portal da Tesouraría Xeral da Seguridade Social.

Todas as persoas que traballen por conta propia cotizarán á Seguridade Social en función dos seus rendementos netos anuais, obtidos no exercicio de todas as súas actividades económicas, empresariais ou profesionais. Non cotizarán por rendementos as persoas que formen parte dunha institución relixiosa pertencente á Igrexa Católica.

Para os efectos de determinar a base de cotización, teranse en conta a totalidade dos rendementos netos obtidos no ano natural, no exercicio das súas distintas actividades profesionais ou económicas, con independencia de que as realicen de forma individual ou como socios ou integrantes de calquera entidade, con ou sen personalidade xurídica, sempre e cando non deban figurar por elas en alta como traballadores por conta allea ou asimilados a estes. O rendemento neto computable de cada unha das actividades exercidas calcularase de acordo co previsto ás normas do IRPF e con algunhas particularidades en función do colectivo ao que pertenzan. Para máis información, consulta Como calculo os meus rendementos?

Do importe resultante deducirase un 7 por cento en concepto de gastos xerais, agás nos casos en que o traballador autónomo reúna as seguintes características, onde a porcentaxe será do 3 por cento:

• Administrador de sociedades mercantís capitalistas cuxa participación sexa maior ou igual ao 25 por cento.
• Socio nunha sociedade mercantil capitalista cunha participación maior ou igual ao 33 por cento.

Para a aplicación da porcentaxe indicada do 3 por cento, abondará con ter figurado noventa días en alta neste réxime especial, durante o período a regularizar, en calquera dos supostos citados anteriormente.

Partindo da media mensual destes rendementos netos anuais, seleccionarase a base de cotización que determinará a cota a pagar.

Anualmente, a Lei de Presupostos Xerais do Estado establecerá unha táboa xeral e unha reducida de bases de cotización que se dividirán en tramos consecutivos de importes de rendementos netos mensuais aos que se asignarán, por cada tramo, unhas bases de cotización máxima e mínima mensual. Na seguinte táboa pódese consultar estes novos tramos de rendementos e as súas correspondentes bases de cotización para os próximos tres anos:

A partir do 1 de xaneiro de 2023 os traballadores autónomos terán a obriga de declarar os seus rendementos previstos a través dos servizos que se encontrarán dispoñibles en Importass, o portal da Tesourería Xeral da Seguridade Social para servizos e trámites online.

Para os autónomos que se dean de alta a partir desta data, solicitarase esa información no proceso de alta que se realice a través de Importass.

No caso de que o autónomo xa estivese dado de alta, poderá modificar a súa base de cotización para axustala á previsión sobre a media mensual dos seus rendementos netos anuais a través do servizo Base de cotización e rendementos.

Os traballadores por conta propia que a 31/12/2022 viñesen cotizando por unha base de cotización superior á que lles correspondería en razón dos seus rendementos estimados, poderán manter en 2023 a devandita base de cotización, aínda que os seus rendementos determinen a aplicación dunha base de cotización inferior.

En Importass hai dispoñible un simulador para realizar o cálculo da cota en función dos rendementos previstos.

• 1 de marzo de 2023, se a solicitude se formula entre o 1 de xaneiro e o último día natural do mes de febreiro.
• 1 de maio de 2023, se a solicitude se formula entre o 1 de marzo e o 30 de abril.
• 1 de xullo de 2023, se a solicitude se formula entre o 1 de maio e o 30 de xuño.
• 1 de setembro de 2023, se a solicitude se formula entre o 1 de xullo e o 31 de agosto.
• 1 de novembro de 2023, se a solicitude se formula entre o 1 de setembro e o 31 de outubro.
• 1 de xaneiro do ano 2024, se a solicitude se formula entre o 1 de novembro e o 31 de decembro.

As bases mensuais elixidas cada ano terán un carácter provisional, ata que se proceda á regularización anual da cotización.

Finalizado o ano natural, a Administración Tributaria facilitará á Tesouraría información sobre os rendementos anuais reais percibidos. Se a cota elixida durante o ano resultase inferior á asociada aos rendementos comunicados pola Administración tributaria correspondente, notificarase ao traballador o importe da diferenza. Este importe deberá ser aboado antes do último día do mes seguinte a aquel en que se recibise a notificación co resultado da regularización.

Se, pola contra, a cotización fose superior á correspondente á base máxima do tramo no que estean comprendidos os rendementos, a Tesouraría procederá a reintegrar a diferenza antes do 30 de abril do exercicio seguinte a aquel no que a correspondente Administración Tributaria comunicase os rendementos computables.

Durante o período 2023-2025, as persoas que causen alta inicial no Réxime de autónomos poderán solicitar a aplicación dunha cota reducida (tarifa plana) de 80 euros mensuais durante os primeiros 12 meses de actividade. A solicitude realizarase no momento de tramitar a alta.

Poderán beneficiarse destas condicións as persoas autónomas que non estivesen dadas de alta nos dous anos inmediatamente anteriores á data de efecto da nova alta, ou ben tres anos, en caso de gozar previamente desta dedución.

Transcorrido eses doce primeiros meses, poderá tamén aplicarse unha cota reducida durante os seguintes doce meses, a aqueles traballadores por conta propia que prevexan que os seus rendementos económicos netos anuais, vaian ser inferiores ao salario mínimo interprofesional anual que corresponda a ese período e así o soliciten no servizo que se habilitará en Importass.

Ademais, as persoas autónomas cunha discapacidade igual ou superior ao 33 por cento, vítima de violencia de xénero ou vítima de terrorismo, poderán solicitar a aplicación, no momento da alta, dunha cota reducida de 80 euros durante os primeiros 24 meses.

Así mesmo, finalizado este período, se o seu rendemento neto previsto fose igual ou inferior ao Salario Mínimo Interprofesional, poderán solicitar, a través do servizo que se habilitará en Importass, a aplicación desta cota reducida durante os seguintes 36 meses, por importe de 160 euros.

Todas as solicitudes de ampliación deberán acompañarse dunha declaración relativa a que os rendementos netos que se prevén obter van ser inferiores ao salario mínimo profesional vixente.

As reducións na cotización previstas nos parágrafos anteriores non resultarán aplicables aos familiares de traballadores autónomos por consanguinidade ou afinidade ata o segundo grao inclusive e, no seu caso, por adopción, que se incorporen ao Réxime Especial da Seguridade Social dos Traballadores por Conta Propia ou Autónomos.

Os traballadores por conta propia que gocen destes beneficios poderán renunciar en calquera momento expresamente á súa aplicación con efectos a partir do día primeiro do mes seguinte ao da comunicación da renuncia correspondente. Esta solicitude tamén se poderá realizar a través do servizo que se habilitará en Importass.

Os traballadores autónomos que a 31 de decembro de 2022 fosen beneficiarios da antiga tarifa plana, continuarán gozando desta, ata que se esgote o período máximo establecido, nas mesmas condicións.

• Bonificación na cotización para autónomos por coidado de menor afectado por unha enfermidade grave.

As persoas autónomas beneficiarias da prestación para o coidado de menores afectados cancro ou outra enfermidade grave terán dereito, durante o período no que perciban a devandita prestación, a unha bonificación do 75 por cento da cota por continxencias comúns, resultante de aplicar a base media dos doce meses anteriores á data en que se inicie esta bonificación, o tipo de cotización para continxencias comúns, excluído o correspondente a IT derivada de continxencias comúns.

Se o traballador leva menos de doce meses dado de alta continuada no Réxime de autónomos, para o cálculo da base media de cotización terase en conta a última data de alta, cuxo resultado se obtén dividindo a suma das bases de cotización entre o número de días nos que estivo dado de alta de xeito continuado, e a contía obtida se multiplica por trinta.

• Bonificación a traballadoras autónomas por reincorporación á súa actividade

As traballadoras autónomas que cesen a súa actividade por nacemento de fillo/a, adopción, garda con fins de adopción, acollemento e tutela e queiran volver realizar unha actividade por conta propia dentro dos dous anos seguintes á data do cesamento, terán dereito a unha bonificación, durante os 24 meses inmediatamente seguintes á data da súa reincorporación ao traballo, do 80 por cento da cota por continxencias comúns, resultante de aplicar á base media dos doce meses anteriores á data en que cesaron a súa actividade, o tipo de cotización para continxencias comúns, excluído o correspondente a IT derivada de continxencias comúns.

Para obter máis información sobre o novo sistema de cotización 2023 consulte a Guía práctica de traballo autónomo.

Pode acceder a este simulador para calcular a cota correspondente ao ano 2023 sobre a base dos rendementos netos previstos. Trátase dun simulador dispoñible na área pública, no que se poderá simular a cota que corresponde aboar cos rendementos netos que a persoa autónoma considere obter ao longo do ano.

Neste folleto informativo recóllense brevemente as principais claves do novo sistema de cotización para autónomos.