Seguridade Social

Incapacidade permanente (IP) é a situación do traballador que, despois de estar sometido ao tratamento prescrito e ser dado de alta medicamente, presenta reducións anatómicas ou funcionais graves, susceptibles de determinación obxectiva e previsiblemente definitivas, que diminúan ou anulen a súa capacidade laboral. Non impedirá tal cualificación a posibilidade de recuperación da capacidade laboral do incapacitado, se esta posibilidade se estima medicamente como incerta ou a longo prazo.

As reducións anatómicas ou funcionais existentes, na data de afiliación do interesado na Seguridade Social, non impedirán a cualificación da situación de IP, cando se trate de persoas discapacitadas e, con posterioridade á afiliación, tales reducións se agravasen, provocando por si mesmas ou por concorrencia con novas lesións ou patoloxías, unha diminución ou anulación da capacidade laboral que tiña o interesado no momento da súa afiliación.

Non será necesaria a alta médica para a valoración da IP nos casos en que concorran secuelas definitivas.

Tamén terá a consideración de IP, no grao que se cualifique, a situación de incapacidade que subsista despois de extinguida a incapacidade temporal (IT) polo transcurso do prazo máximo de duración da mesma, agás no suposto en que, continuando a necesidade de tratamento médico pola expectativa de recuperación ou a mellora do estado do traballador con vistas á súa reincorporación laboral, a situación clínica do interesado fixera aconsellable demorar a citada cualificación (non poderá superar os 24 meses seguintes á data en que se iniciase a IT), en cuxo caso  non se accederá á situación de IP ata que non se proceda á correspondente cualificación.

A IP haberá de derivarse da situación de incapacidade temporal, agás que afecte a quen careza de protección en canto a esta IT, ben por atoparse nunha situación asimilada á de alta que non a comprenda, ben nos supostos de asimilación a traballadores por conta allea nos que se dea a mesma circunstancia, ou ben nos casos de acceso á IP dende a situación de non alta.