Seguridade Social

En que consiste?

Consiste en considerar como situación protexida o período de suspensión do contrato de traballo ou de interrupción da actividade das traballadoras nos supostos en que ao ter a traballadora que cambiar de posto de traballo, por influír na súa saúde o na do seu fillo debido á existencia de determinados riscos ou patoloxías, o devandito cambio non resulte obxectivamente posible ou non se poida esixir razoablemente por motivos xustificados.

SUBIR

Cando non se considera protexida a situación de risco?

Non terá a consideración de protexida aquela que se derive de riscos ou patoloxías que poidan influír negativamente na saúde da traballadora ou do fillo cando non estea relacionada con axentes, procedementos ou condicións de traballo do posto ou actividade realizados.

SUBIR

Que requisitos se esixen para ser beneficiaria?

As traballadoras declaradas en situación de suspensión do contrato de traballo ou de interrupción da actividade por risco natural durante a lactación deberán estar:

• Afiliadas e en alta nalgún dos réximes da Seguridade Social. Non se esixe un período mínimo de cotización ao derivarse de continxencias profesionais.
  
• Ademais, estarán ao corrente no pagamento das cotas, das que sexan responsables directas as traballadoras.

SUBIR

Que ocorre se a traballadora non ten cubertos os riscos profesionais?

Tanto no caso das traballadoras por conta propia que non efectuasen a opción pola cobertura de continxencias profesionais, como no caso das empregadas do fogar, en cuxo réxime de Seguridade Social non se contemplan as continxencias profesionais, a prestación concédese como derivada de continxencia común.

SUBIR

Que ocorre coas situacións sobrevidas estando a traballadora en situación de pluriemprego ou pluriactividade?

Cando a traballadora se encontre nalgunha destas dúas situacións, haberá que ter en conta se o risco se ocasiona en todas as actividades que vén realizando ou só nunha delas. 

SUBIR

Cal é a contía da prestación?

A contía é o 100 % da base reguladora, que será a equivalente á que estea establecida para a prestación de IT derivada de continxencias profesionais.

No caso de traballadoras por conta allea, obtense da adición de dous sumandos:

• A base de cotización por continxencias profesionais do mes anterior ao feito causante, sen horas extraordinarias, dividida polo número de días aos que corresponda esta cotización.
• Máis a cotización por horas extraordinarias, realizadas no ano anterior, dividida entre 365 días.

No caso de traballadoras por conta propia, estará constituída pola base de cotización correspondente ao mes anterior ao feito causante, dividida entre 30.

Ao efectuarse o pagamento, deduciranse os importes por cotizacións á Seguridade Social (traballadoras por conta allea) e, no seu caso, as retencións que procedan por IRPF.

SUBIR

Cando se inicia?

• Traballadoras por conta allea: o dereito ao subsidio nace dende o mesmo día no que se inicie a suspensión do contrato de traballo por risco durante a lactación, tras a declaración de situación de risco emitida polos servizos médicos competentes.

• Traballadoras por conta propia e empregadas do fogar responsables da obriga de cotizar: o día seguinte a aquel no que se emite o certificado polos servizos médicos competentes, aínda que os efectos económicos non se producirán ata a data do cesamento efectivo na actividade profesional.

SUBIR

Cal é a súa duración?

Aboarase durante o período necesario para a protección da saúde da traballadora e e/ou do fillo e finalizará no momento en que o fillo faga os 9 meses, salvo que a traballadora se incorporase con anterioridade ao seu posto de traballo/actividade profesional anterior ou a outro/a compatible coa súa situación.

SUBIR

Cal é a duración nos supostos de traballadoras contratadas a tempo parcial?

O subsidio aboaráselles ás traballadoras contratadas a tempo parcial durante todos os días naturais nos que se manteña a suspensión do contrato de traballo durante a lactación natural, coa excepción aludida na pregunta anterior.

SUBIR

Cando se extingue?

• No momento en que o fillo faga 9 meses, salvo que a muller traballadora se incorporase con anterioridade ao seu posto de traballo anterior ou a outro compatible coa súa situación (conta allea) ou retomase a actividade profesional realizada (conta propia).

• Por extinción do contrato de traballo en virtude das causas legalmente establecidas (conta allea) ou por causar baixa no réxime especial da Seguridade Social no que traballadora estivese incluída.

• Por falecemento.

SUBIR

Quen xestiona e paga a prestación?

Con carácter xeral, a xestión e o pagamento da prestación correrá a cargo da entidade xestora (INSS ou ISM) ou da mutua de AT e EP en función da entidade coa que a empresa da traballadora teña concertada a cobertura de riscos profesionais.

Nos casos de traballadoras do réxime especial de autónomos, se a opción pola cobertura da IT se formalizase cunha mutua e non se optase por asegurar as continxencias profesionais, é a mutua a responsable do seu aboamento. Polo contrario, se a traballadora ten cuberta a IT co INSS e non optou por asegurar as continxencias profesionais, o pagamento das prestacións será por conta deste.

Respecto ás traballadoras por conta propia do réxime especial agrario, se a opción pola mellora voluntaria da IT se formalizase co INSS, pero as continxencias profesionais estivesen concertadas cunha mutua, a prestación será aboada por esta última.

As traballadoras do réxime especial de empregadas do fogar, tanto fixas como descontinuas, ao non ter recoñecidas as continxencias profesionais, nin poder formalizar a prestación de IT cunha mutua, percibirán a prestación a través do INSS.

SUBIR