Seguridade Social

Que porcentaxe de pensión me corresponde segundo as cotizacións?

A contía da pensión de xubilación determínase ao aplicarlle á base reguladora as porcentaxes seguintes:

• Polos primeiros 15 anos cotizados: o 50%.

• Por cada ano adicional de cotización, comprendido entre o 16º e o 25º, ambos os dous incluídos: o 3%.

• Por cada ano adicional de cotización, a partir do 26º: o 2%, sen que a porcentaxe aplicable á base reguladora supere o 100%. Con todo, existe a posibilidade de superar ese 100% cando o interesado acredite 35 anos cotizados e 65 anos de idade cumpridos.
  

SUBIR

Modifícase a porcentaxe da pensión ao facer os 65 anos?

A porcentaxe fixada no momento do recoñecemento da pensión de xubilación non sofre variación polo feito de que o beneficiario alcance a idade de 65 anos.

Non obstante, se ao facer os 65 anos o importe da pensión fose inferior á pensión mínima establecida para esa idade, garantiríaselle esta sempre que reunise os requisitos esixidos.

SUBIR

Os días de bonificación por idade feita o 1/1/67, téñense en conta para acreditar o período mínimo de cotización esixido?

Para os efectos de acreditar o período mínimo de cotización (carencia) esixido para acceder a unha prestación, só se computan, con carácter xeral,  as cotizacións efectivamente realizadas e as asimiladas por pagas extras (son os denominados días-cota).

O tempo de bonificación que se lle concede segundo a idade que tivera o 1-1-1967 non serve para acreditar o período mínimo de cotización esixido, só se terá en conta para a determinación da porcentaxe da pensión.

SUBIR

Que contía de pensión me corresponde se me xubilo parcialmente?

A contía da pensión será o resultado de aplicarlle a porcentaxe de redución de xornada ao importe da pensión que lle correspondería, segundo os anos cotizados, na data do feito causante.

Para os efectos de determinar a porcentaxe aplicable á base reguladora da pensión de xubilación parcial, cando se acceda a esta antes de facer os 65 anos, non se aplicarán coeficientes redutores en función da idade.

SUBIR

No caso de xubilación flexible, que efectos teñen as cotizacións efectuadas polas actividades realizadas mediante o contrato a tempo parcial?

As cotizacións efectuadas nas actividades realizadas, durante a suspensión parcial da percepción da pensión de xubilación, producirán efectos para a mellora da pensión, unha vez producido o cesamento no traballo.

Para estes efectos, unha vez comunicado o cesamento na realización das actividades á Entidade xestora competente, restablecerase a percepción íntegra da pensión de xubilación, previo cálculo de novo da súa contía conforme ás regras seguintes:

• Serven para calcular de novo a base reguladora, mediante o cómputo das novas cotizacións e aplicando as normas que estean vixentes no momento do cesamento na actividade. Se o resultado é unha base reguladora inferior á anterior, mantense a fixada anteriormente, pero ao aplicarlle á pensión resultante as revalorizacións que houbera desde a data de determinación da base reguladora ata o cesamento no traballo.
  
• Tamén serven para incrementar a porcentaxe aplicable á base reguladora,  que pode superar o tope do 100%  e, no seu caso,  para diminuír ou suprimir o coeficiente redutor que se aplicase se a xubilación inicial fose anticipada. Para iso, deberá cotizar polo menos un ano teórico (ao seren cotizacións parciais, o seu cómputo basearíase no cálculo de días teóricos e o número obtido multiplicaríase por 1,5).
  

SUBIR