Obriga de subscribir convenio especial

Naqueles expedientes de regulación de emprego de empresas non incursas en procedemento concursal, que inclúan traballadores con 55 ou máis anos de idade que non tivesen a condición de mutualistas o 1-1-67, existirá a obriga de aboar as cotas destinadas ao financiamento dun convenio especial respecto destes traballadores.
As cotizacións deste convenio abarcarán o período comprendido entre a data na que se produza o cesamento no traballo ou, no seu caso, no que cese a obriga de cotizar por extinción da prestación por desemprego contributivo, e a data na que o traballador faga os 65 anos.
As cotas determinaranse aplicando, á media das bases de cotización do traballador nos últimos 6 meses de ocupación cotizada, o tipo de cotización previsto na normativa reguladora do convenio especial. Da cantidade resultante, deducirase a cotización, a cargo do Instituto de Emprego, Servizo Público de Emprego Estatal, correspondente ao período no que o traballador poida ter dereito á percepción do subsidio de desemprego, calculando a mesma en función da base e tipo aplicable na data de subscrición do convenio especial.
As cotizacións serán a cargo:
- Do empresario ata a data na que o traballador faga os 61 anos de idade. Ingresaranse na Tesourería Xeral da Seguridade Social (TXSS), ben dunha soa vez, dentro do mes seguinte ao da notificación por parte da citada TXSS da cantidade a ingresar, ben de maneira fraccionada, garantindo o importe pendente mediante aval solidario ou a través da substitución do empresario no cumprimento da obriga por parte dunha entidade financeira ou aseguradora, previo consentimento da TXSS.
- Do traballador a partir de que o mesmo faga os 61 anos. As achegas serán obrigatorias e a cargo exclusivo do traballador, debendo ser ingresadas ata que teña a idade de 65 anos ou ata a data en que, no seu caso, acceda á pensión de xubilación anticipada.
Nos supostos de falecemento do traballador, de recoñecemento dunha pensión de incapacidade permanente ou de realización de actividades en virtude das cales se efectúen cotizacións ao Sistema de Seguridade Social, reintegraranse ao empresario, previa regularización anual e nos termos que regulamentariamente se establezan, as cotas que, no seu caso, se ingresasen polo convenio especial correspondentes ao período posterior á data na que tivese lugar o falecemento ou o recoñecemento da pensión, así como as coincidentes pola realización das actividades citadas ata a contía das cotas correspondentes a estas últimas.

Información Relacionada