Dende o 1 de xaneiro de 2024, este día inclusive, as bases e tipos de cotización por continxencias comúns  a este Sistema Especial serán as seguintes:

• Para as continxencias de cobertura obrigatoria, cando o traballador optase por elixir como base de cotización ata 1.141,18 euros/mes o tipo de cotización será o 18,75 por cento.
  
  Se o traballador cotizase por unha base superior a 1.141,18 euros/mes, á contía que exceda desta última seralle de aplicación o tipo de cotización do 26,50 por cento.
  
  
• Respecto da mellora voluntaria da incapacidade temporal por continxencias comúns, o tipo de cotización que hai que aplicar á contía completa da base de cotización do interesado, será do 3,30 por cento, ou o 2,80 por cento se o interesado está acollido á protección por continxencias profesionais ou por cesamento de actividade.

Para as continxencias de accidentes de traballo e enfermidades profesionais, aplicaranse os tipos da tarifa de primas establecida na disposición adicional cuarta da Lei 42/2006, do 28 de decembro, sobre a mesma base de cotización elixida polos interesados para continxencias comúns.

No suposto de traballadores que despois de estar encadrados no Réxime Especial Agrario pasasen a incorporarse a este Sistema Especial e non optasen pola cobertura da totalidade das continxencias profesionais, seguirase aboando, en concepto de cobertura das continxencias de invalidez permanente e morte e supervivencia, unha cota resultante de aplicar sobre a base de cotización elixida o tipo do 1,00 por cento.

Igualmente, os traballadores incluídos neste Sistema Especial que non optasen pola cobertura da totalidade das continxencias de accidentes de traballo e enfermidades profesionais, efectuarán unha cotización adicional equivalente do 0,10 por cento, prevista para financiar as prestacións por risco durante o embarazo e risco durante a lactación natural.

A obriga de cotizar pola protección de cesamento de actividade neste sistema especial afectará os traballadores incluídos neste, que teñan cuberta a totalidade das continxencias profesionais.

Para os traballadores que de forma voluntaria se acollan á cobertura de Cesamento de Actividade, o tipo de cotización aplicable será o 2,20 por cento.

Os traballadores que cumpran os seguintes requisitos (art. 324 LGSS):

• Ser titulares dunha explotación agraria e obter, polo menos, o 50 por cento da súa renda total da realización de actividades agrarias ou outras complementarias, e que esa parte da renda proceda directamente da actividade agraria realizada na súa explotación e non sexa inferior ao 25 por cento da renda total.
• O tempo de traballo dedicado ás actividades agrarias debe ser superior á metade do seu tempo de traballo total.
• Que os rendementos anuais netos obtidos da explotación agraria por cada titular desta non superen a contía equivalente ao 75 por cento do importe, en cómputo anual, da base máxima de cotización ao Réxime Xeral da Seguridade Social vixente no exercicio en que se proceda á súa comprobación.
• A realización dos labores agrarios, aínda cando ocupen traballadores por conta allea, sempre que non se trate de máis de dous traballadores que coticen coa modalidade de bases mensuais ou, de tratarse de traballadores que coticen coa modalidade do artigo 255, que o número total de xornadas reais efectivamente realizadas non supere as 546 nun ano, computado dende o 1 de xaneiro a 31 de decembro de cada ano.
  

As limitacións na contratación de traballadores por conta allea a que se refire o parágrafo anterior se entenden aplicables por cada explotación agraria. No caso de que na explotación agraria existan dous ou máis titulares, en alta todos eles no Sistema Especial para traballadores por conta propia agrarios do Réxime Especial dos Traballadores por Conta Propia ou Autónomos, engadirase ao número de traballadores ou xornais previstos no parágrafo anterior un traballador máis con cotización por bases mensuais, ou douscentos setenta e tres xornais ao ano, en caso de traballadores con cotización por xornadas reais, por cada titular da explotación agraria, excluído o primeiro.

Entenderase por explotación agraria, neste sistema especial, o conxunto de bens e dereitos organizados polo seu titular, no exercicio da actividade agraria, que constitúe en si mesma unha unidade técnico-económica, podendo a persoa titular ou titulares da explotación selo pola súa condición de propietaria, arrendataria, parceira, cesionaria ou outro concepto análogo, dos terreos ou elementos materiais da respectiva explotación agraria.

A este respecto enténdese por actividade agraria o conxunto de traballos que se require para a obtención de produtos agrícolas, gandeiros e forestais, incluíndo para estes efectos a venda directa por parte da agricultora ou agricultor da produción propia sen transformación ou a primeira transformación destes cuxo produto final estea incluído no anexo I do artigo 38 do Tratado de funcionamento da Unión Europea, dentro dos elementos que integren a explotación, en mercados municipais ou en lugares que non sexan establecementos comerciais permanentes, considerándose tamén a actividade agraria toda aquela que implique a xestión ou a dirección e xerencia da explotación.

A incorporación a este sistema especial afectará, ademais de ao titular da explotación agraria, ao seu cónxuxe e parentes por consanguinidade ou afinidade ata o terceiro grao inclusive, que non teñan a consideración de traballadores por conta allea, sempre que sexan maiores de dezaoito anos e realicen a actividade agraria de forma persoal e directa na correspondente explotación familiar.

Os fillos do titular da explotación agraria, menores de trinta anos, aínda que convivan con el, poderán ser contratados por aquel como traballadores por conta allea.