Recoñecer pensións vitalicias e de contía fixa de vellez, invalidez ou viuvez polas cotizacións realizadas ao extinguido Seguro de Vellez e Invalidez (SOVI) ou ter estado afiliado ao Retiro Obreiro.

As persoas que reúnan os requisitos establecidos  para cada clase de pensión.

Ademais de non ter dereito a pensión do actual sistema da Seguridade Social, agás as pensións de viuvez das que poidan ser beneficiarios, deberanse cumprir uns requisitos específicos segundo a pensión de que se trate:

• Vellez: Ter feito os 65 anos ou 60 se se trata de vellez por incapacidade e ter cotizados 1800 días antes do 1-1-1967 ou afiliación ao Retiro Obreiro.
  
  
• Invalidez: 1.800 días cotizados ao SOVI , ter 50 anos feitos e estar incapacitado de forma permanente para o traballo.
  
  
• Viuvez: Os requisitos esixidos dependen da data de falecemento do causante e de se era ou non pensionista.

A contía varía segundo exista ou non concorrencia con outras pensións:

• Se non existe concorrencia: 462,20 euros mensuais.
• Se existe concorrencia:  448,60 euros mensuais.

Cando concorran a pensión de viuvez e a do SOVI, a súa suma non poderá ser superior ao dobre do importe da pensión mínima de viuvez para beneficiarios maiores de 65 anos establecido en cada momento. Se se supera o devandito límite, procederase á minoración da contía da pensión do SOVI no importe necesario para non exceder do límite indicado.

Vellez: Percibirase a partir do día seguinte a facer os 65 anos, se se presenta a solicitude nos 30 días seguintes.  Se  se presenta despois, percibirase a partir do día primeiro do mes seguinte á súa presentación.

Invalidez: Percíbese a partir do día primeiro do mes seguinte á solicitude.

Viuvez:

• Se o causante non era pensionista e a solicitude se presenta dentro do ano seguinte ao falecemento, aboarase dende o día primeiro do mes seguinte ao de falecemento. Se se presenta fóra do ano seguinte ao falecemento, aboarase cuns efectos retroactivos dun ano á data de solicitude.
• Se o causante era pensionista e a solicitude se presenta dentro dos 3 meses seguintes ao falecemento, aboarase dende o día primeiro do mes seguinte ao de falecemento. Se se presenta fóra dos 3 meses seguintes ao falecemento, os efectos retroactivos son de 3 meses á data da solicitude.

A pensión abóase mensualmente con dúas pagas extraordinarias que se devindican coa mensualidade de xuño e de novembro.

As pensións do SOVI son incompatibles entre si e poden selo con outras pensións, agás a pensión de viuvez a que o beneficiario puidese ter dereito e co traballo. Mais os beneficiarios poden exercitar o dereito de opción pola pensión máis favorable.

O recoñecemento das pensións do SOVI  deberá resolverse e notificarse ao interesado nos seguintes prazos:

• Vellez e viuvez: 90 días.
• Invalidez: 135 días.

As pensións do SOVI extínguense polo falecemento do pensionista e, no caso da pensión de viuvez e en determinadas situacións, por matrimonio ou por constituír unha parella de feito.

Solicitude da pensión de xubilación, invalidez, viuvez.

A documentación que debe presentar para o trámite da pensión está detallada no modelo de solicitude de xubilación, de invalidez ou de viuvez.

Nos centros de atención e información da Seguridade Social dependentes do Instituto Nacional da Seguridade Social (INSS) ou nas direccións provinciais ou locais do Instituto Social da Mariña (ISM), se é o caso.

A xestión e o recoñecemento do dereito ás pensións do extinguido SOVI corresponde ao INSS ou ISM, se é o caso.