Fillos que dan dereito á prestación

Serán causantes cada fillo nacido ou adoptado, a partir do 1 de xullo de 2007, sempre que o nacemento se producise en territorio español e que a adopción se constituíse ou recoñecese por autoridade española competente.

Enténdese como nacido o feto con figura humana e que teña vivido 24 horas enteiramente desprendido do seo materno (art. 30 do Código Civil).

SUBIR

Beneficiarios

As persoas que a seguir se indican, sempre que acrediten a súa residencia de forma legal, efectiva e continuada en territorio español durante polo menos os 2 anos inmediatamente anteriores ao nacemento ou adopción.

• En caso de nacemento, sempre que este se producise en territorio español, será beneficiaria a nai. Se esta falece sen solicitar a prestación ou a percepción anticipada da dedución, será beneficiario o outro proxenitor.
  
  
• En caso de adopción, sempre que esta se constituíse ou recoñecese por autoridade española competente:
  
  
  • Se os adoptantes fosen de distinto sexo, a muller. Se esta falece sen solicitar a prestación ou a percepción anticipada da dedución, será beneficiario o outro adoptante.
    
    
  • Se os adoptantes fosen do mesmo sexo, será aquela que determinen de común acordo.
    
    
  • Se a adopción se produce por unha soa persoa, será esta. En ningún caso será beneficiario o adoptante cando se produza a adopción dun menor por unha soa persoa e subsista a patria potestade dun dos proxenitores.

SUBIR

Contías

Por cada fillo nacido ou adoptado, o beneficiario terá dereito a:

• Unha dedución de 2.500 euros anuais no IRPF cando, sendo contribuínte do deste imposto, concorra algunha das circunstancias seguintes:


• Que realice unha actividade por conta propia ou allea pola que estea dado de alta no réxime que corresponda da Seguridade Social ou mutualidade no momento do nacemento ou adopción.


• Que percibise no período impositivo anterior rendementos ou ganancias de patrimonio suxeitos a retención ou ingreso a conta, ou rendementos de actividades económicas polos que se efectuasen os correspondentes pagamentos fraccionados.

Esta dedución poderase percibir de forma anticipada e con cargo ao tramo estatal do imposto.


• Unha prestación non contributiva da Seguridade Social de 2.500 euros, se non traballa ou non obtén rendas suxeitas a retención do IRPF ou cando se trate dun contribuínte ao que lle resulten aplicables as normas forais de Navarra ou do País Vasco no IRPF.

O beneficiario poderá cederlle o dereito ao cobro da dedución ou da prestación económica ao outro proxenitor ou adoptante cando lle sexa recoñecido, sempre que este reúna os requisitos esixidos.

SUBIR

Compatibilidades

A percepción da prestación por nacemento ou adopción de fillo será compatible coa percepción das demais prestacións familiares da Seguridade Social, pero incompatible coas deducións do IRPF.

SUBIR

Xestión e recoñecemento do dereito

Xestión

A xestión e administración da prestación económica non contributiva é competencia do INSS, malia delegarse o seu exercicio nos órganos competentes da Axencia Estatal da Administración Tributaria (AEAT).

Prazo de presentación da solicitude:

A solicitude poderase presentar a partir da inscrición do nacemento ou adopción do fillo no Rexistro Civil.

Prescrición:

O dereito ao recoñecemento da prestación prescribe aos 5 anos, contados desde o día seguinte a aquel no que se produce o feito causante.

SUBIR

Documentos que deben acompañar á solicitude

A presentación da solicitude de aboamento anticipado da dedución no IRPF e da prestación non económica, axustadas aos modelos 140 e 141, non requirirá que se acompañe ningún documento xustificativo do cumprimento dos requisitos esixidos, cuxa verificación se efectuará pola |AEAT mediante o intercambio da información necesaria coas administracións públicas competentes en cada caso.

Non obstante, nos casos en que efectuado o intercambio de información, non se puidese constatar o cumprimento dos requisitos esixidos, poderáselle requirir ao solicitante a achega, entre outros, dos seguintes documentos:

1. O certificado de empadroamento que acredite a condición de residente en España, de tratarse de persoas de nacionalidade española ou de estranxeiros que non teñan a obriga de obter o permiso de residencia.
2. Certificado da policía que acredite a data de obtención do permiso de residencia, de tratarse de estranxeiros que teñen a obriga de obtelo.
3. Libro de familia ou certificado en extracto da inscrición de filiación do nacido ou adoptado, expedido polo Rexistro Civil que corresponda.

SUBIR

Formularios de solicitude

Deberán presentar o modelo 140:

Os contribuíntes do IRPF con dereito á aplicación do pagamento anticipado da dedución por maternidade e que, á súa vez, desexen percibir o aboamento anticipado da dedución por nacemento ou adopción.

Deberán presentar o modelo 141:

• As persoas que, por non ter dereito á dedución do IRPF por nacemento ou adopción ou por non ter a súa residencia fiscal en territorio foral (País Vasco ou Navarra), sexan beneficiarias da prestación económica de pagamento único da Seguridade Social.
• Tamén utilizarán este modelo os contribuíntes do IRPF con dereito á dedución por nacemento ou adopción que non teñan dereito á dedución por maternidade ou ao aboamento anticipado desta ou que, tendo dereito a este último, non o solicitasen.
  

SUBIR

Como e onde se presentan as solicitudes

• Presentación telemática: a través da Internet http://www.agenciatributaria.es (o modelo 141 a partir do 01-01-2008).
  
  
• Presentación telefónica: mediante chamada ao Centro de Atención Telefónica da Axencia Estatal da Administración Tributaria cuxo número é 901 200 345.
  
  
• En calquera Delegación ou Administración da Axencia Estatal da Administración Tributaria. O modelo 141 tamén se poderá presentar en calquera oficina do INSS.
  
  
• Máis información na AEAT.

SUBIR