De conformidade coas precisións contidas no Real Decreto-Lei 8/2023, do 27 de decembro, polo que se adoptan medidas para afrontar as consecuencias económicas e sociais derivadas dos conflitos en Ucraína e Oriente Próximo, así como paliar os efectos da seca, establécese que en tanto se aprobe a Lei de Orzamentos Xerais do Estado para o ano 2024, o contido do título IV e das disposicións adicionais concordantes da Lei 31/2022, do 23 de decembro, de Orzamentos Xerais do Estado para o ano 2023, así como das súas disposicións de desenvolvemento manteñen a súa vixencia en 2024 coas modificacións e excepcións que a continuación se establecen:

As pensións aboadas polo sistema da Seguridade Social, na súa modalidade contributiva, así como as pensións ordinarias e extraordinarias do Réxime Especial de Clases Pasivas do Estado revalorizaranse en 2024 con carácter xeral o 3,8 por cento respecto do importe que tivesen a 31 de decembro de 2023.

As prestacións de orfandade causadas por violencia contra a muller, previstas no terceiro parágrafo do artigo 224.1 do texto refundido da Lei Xeral da Seguridade Social, experimentarán en 2024 un incremento igual ao que se aprobe para o salario mínimo interprofesional para o devandito ano.

Importe da revalorización:

1. As pensións de incapacidade permanente, xubilación, viuvez, orfandade e en favor de familiares do sistema da Seguridade Social na súa modalidade contributiva, causadas con anterioridade ao 1 de xaneiro de 2024 e non concorrentes con outras, revalorizaranse o 3,8 por cento.

2. O importe da pensión, unha vez revalorizada, estará limitado á cantidade de 3.175,04 euros, entendendo esta cantidade referida ao importe dunha mensualidade ordinaria, sen prexuízo das pagas extraordinarias que puidesen corresponder. O devandito límite mensual será obxecto de adecuación naqueles supostos en que o pensionista teña dereito ou non a percibir 14 pagas ao ano, comprendidas nun ou outro caso, as pagas extraordinarias, para os efectos de que a contía non supere ou poida alcanzar, respectivamente, 44.450,56 euros, en cómputo anual.

3. As pensións que excedan de 3.175,04 euros mensuais non se revalorizarán, agás o sinalado no apartado 2.

4. A revalorización das pensións de grande invalidez efectuarase aplicando as regras previstas no apartado 1 de xeito separado á pensión e ao complemento. Para os efectos do límite máximo sinalado no apartado 2, computarase unicamente a pensión sen complemento.

Nos supostos de revalorización de pensións concorrentes do sistema da Seguridade Social ou con outras pensións públicas, estarase ao disposto no Real Decreto 8/2023, do 27 de decembro.

Aplicación da revalorización:

A revalorización aplicarase ao importe mensual que tivese a pensión de que se trate o 31 de decembro de 2023, excluídos os conceptos que a continuación se enumeran:

1. Os complementos recoñecidos para alcanzar os mínimos establecidos con anterioridade.

2. A recarga de prestacións económicas por falta de medidas de seguridade e hixiene no traballo.

3. As percepcións de rendas temporais por cargas familiares e a indemnización suplementaria para a provisión e renovación de aparatos de prótese e ortopedia, no suposto de pensións do extinguido seguro de accidentes de traballo e enfermidades profesionais.

Pensións do SOVI:

1. A revalorización das pensións do extinguido SOVI non concorrentes con outras pensións públicas, calquera que sexa a data do feito causante, consistirá na diferenza entre o importe da pensión a 31 de decembro de 2023 e a contía de 7.399,00 euros, en cómputo anual.

Aos efectos do previsto no parágrafo anterior, non se considerarán pensións concorrentes a prestación económica recoñecida ao abeiro da Lei 3/2005, do 18 de marzo, nin a pensión percibida polos mutilados útiles ou incapacitados de primeiro grao por causa da pasada guerra civil española, calquera que fose a lexislación reguladora, nin o subsidio por axuda de terceira persoa previsto no texto refundido da Lei Xeral de dereitos das persoas con discapacidade e da súa inclusión social, aprobado polo Real Decreto Lexislativo 1/2013, do 29 de novembro, nin as pensións extraordinarias derivadas de actos de terrorismo.

Cando, para o recoñecemento dunha pensión do extinguido SOVI, se totalicen períodos de seguro ou de residencia cumpridos noutros países vinculados a España por norma internacional de Seguridade Social que prevexa a devandita totalización, o importe da pensión rateada a cargo de España non poderá ser inferior a 3.510,50 euros en cómputo anual.

Esta mesma garantía aplicarase en relación cos titulares doutras pensións distintas das do extinguido Seguro Obrigatorio de Vellez e Invalidez que opten por algunha destas pensións, sempre que na data do feito causante da pensión que se veña percibindo tivesen reunido todos os requisitos esixidos polo devandito seguro.

2. A revalorización establecida no apartado anterior non ten carácter consolidable.